ყოფილმა თავდაცვის მინისტრის, ირაკლი ოქრუაშვილის პოლიტიკური მოძრაობის, გამარჯვებული საქართველოს პრეზენტაცია დღეს, 11 ივნისს გაიმართა.

ოქრუაშვილმა წარადგინა თანამებრძოლები, მათ შორის მსახიობი ნიკა რამიშვილი, ეროვნული ფორუმის ლიდერი, გუბაზ სანიკიძე, ცესკოს ყოფილი თავმჯდომარე, გურამ ჩალაგაშვილი.

“ეს არ არის ერთი ადამიანის ვერტიკალზე აგებული პოლიტიკური სტრუქტურა. ჩვენ გვაქვს ამბიცია შევქმნათ ძალიან ბევრი გაბრაზებული ადამიანის დიდი მოძრაობა.”— თქვა ოქრუაშვილმა.

ირაკლი ოქრუაშვილმა აღნიშნა, რომ მისი გაერთიანება ითანამშრომლებს ქართული ოცნების იმ წევრებთანაც, რომელიც დაუპირისპირდება ბიძინა ივანიშვილს.

ირაკლი ოქრუაშვილს დაუსვეს კითხვა, თუ რას ფიქრობს ის სოსო რობაქიძის განცხადებაზე, რომელიც ცოტა ხნით ადრე მივიდა ადგილზე და ოქრუაშვილის პოლიტიკაში დაბრუნება გააპროტესტა. მისი თქმით, რობაქიძეს თუ რაიმე პრეტენზია აქვს, უნდა მიმართოს ბიძინა ივანიშვილის სასამართლოს. ოქრუაშვილმა ასევე ყურადღება არ გაამახვილა არც რობაქიძის ინიციატივაზე, რომ ის ორგანიზაცია “გადაარჩინე სიცოცხლე”-ს განაახლებდა მასთან საბრძოლველად:

“მისი გადასაწყვეტია რას გააკეთებს, ამაზე მე ვერ ვისაუბრებ, მე რობაქიძის ექსპერტი ვერ გავხდები და არც რობაქიძეა დედამიწის ჭიპი, რომ მის ირგვლივ იტრიალოს დედამიწამ”.

საინიციატივო ჯგუფს არ ეყოლება ერთი ლიდერი და პოლიტიკური საბჭო გაუძღვება. ყრილობა გაიმართება ოქტომბერში, სადაც ოფიციალურად გააფორმებენ ყველაფერს. პრეზენტაციაზე აღნიშნეს, რომ მათი მთავარი მტერი ბიძინა ივანიშვილია.

ფოტო: გვანცა ნემსაძე / On.ge

ფოტო: გვანცა ნემსაძე / On.ge