ოკუპირებული ცხინვალის რეგიონის დე ფაქტო საპარლამენტო არჩევნებში ანატოლი ბიბილოვის პარტია ერთიანი ოსეთი იმარჯვებს. არჩევნები შერეული, მაჟორიტარულ-პროპორციული სისტემით 9 ივნისს ჩატარდა. დე ფაქტო პარლამენტი ხუთი წლის ვადით ირჩევა.

დე ფაქტო არჩევნებთან დაკავშირებით სულ 77 საარჩევნო უბანი იყო გახსნილი, მათ შორის მოსკოვში, ოკუპირებულ სოხუმსა და ჩრდილოეთ ოსეთში. დე ფაქტო ცენტრალური კომისიის თქმით, ამომრჩეველთა აქტივობამ 55,6 პროცენტი შეადგინა. წინასწარი შედეგებით, პირველ ადგილზე გადის ერთიანი ოსეთი, შემდეგ მოდიან სახალხო პარტია და ნახისი.

არალეგიტიმური არჩევნები შეაფასა საგარეო საქმეთა სამინისტრომ. უწყების თქმით, ეს არღვევს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში. საგარეო საქმეთა სამინისტრო მიმართავს საერთაშორისო თანამეგობრობას, სათანადოდ შეაფასოს ოკუპირებული ცხინვალის რეგიონში მიმდინარე ე.წ. საპარლამენტო არჩევნები. უწყება მოუწოდებს რუსეთის ფედერაციას, შეასრულოს ნაკისრი საერთაშორისო ვალდებულებები და გაიყვანოს თავისი ჯარები საქართველოს ტერიტორიიდან.