ევროპული საქართველოს განცხადებით, ქართული ოცნების აქტივისტი ანი გელოვანი, რომელიც, პარალელურად, საქართველოს რკინიგზაში მუშაობს, ოპოზიციონერ აქტივისტებს, კატო კოპალეიშვილსა და ანი ბარამიძეს თავს დაესხა. მათივე ცნობით, გელოვანი ხელს უშლიდა მათ უბნის მიმდებარედ ვიდეოს გადაღებაში და მათთვის მობილურის წართმევა სცადა.

"ანი გელოვანი შემდეგ დაიმალა, თუმცა უბნის უკანა შესასვლელიდან ჩანდა, რომ ეზოში იდგა, ხოლო მას შემდეგ, რაც კამერა და ჟურნალისტები შენიშნა, ის სადარბაზოში შევიდა და კარი შეიკეტა. ამ დროისთვის დაზარალებული აქტივისტები პოლიციაში ჩვენებას აძლევენ", — აცხადებენ ევროპულ საქართველოში.

ევროპულმა საქართველომ არჩევნების დღეს რამდენიმე ვიდეო გაავრცელა. მათი წევრების განცხადებით, ქართული ოცნება ამომრჩეველს ხმის მიცემას აიძულებს. ერთ ვიდეოსთან დაკავშირებით, რომელშიც ქართული ოცნების მხარდამჭერი დავით იმნაძე მონაწილეობს, გამოძიება მუქარის მუხლით დაიწყო.