ევროპული საქართველოს ლიდერმა, ელენე ხოშტარიამ თქვა, რომ ქართული ოცნების სასარგებლოდ, ამომრჩევლის მოსყიდვა პირდაპირ საარჩევნო უბნების წინ მიმდინარეობს. მან ბრიფინგზე ორი ვიდეო მასალა აჩვენა. ხოშტარიას თქმით, მე-18 საარჩევნო უბანზე გადაღებულ ვიდეოში ჩანს, როგორ კარნახობს უცნობი პირი ამომრჩეველს ლადო კახაძის სასარგებლოდ 41-ის შემოხაზვას.

"მეორე ტურში, როგორც ჩანს, შეშინებული ხელისუფლება კიდევ უფრო პანიკაში ჩავარდა და ყველა უბანზე მობილიზებული ჰყავთ მთელი ხელისუფლება, ადგილობრივი თვითმმართველობა, რომლებიც ჰარმონიულად არიან შერწყმულნი ადგილობრივ ძველ ბიჭებთან, კრიმინალური მენტალიტეტის ადამიანებთან და ცდილობენ შექმნან აგრესიული ვითარება, რაც მათ უსუსურობაზე მიუთითებს", — თქვა ელენე ხოშტარიამ.

ევროპული საქართველო წინა საარჩევნო პერიოდშიც საუბრობდა, რომ ხელისუფლება მეორე ტურში გასამარჯვებლად კრიმინალურ ავტორიტეტებს იყენებდა. მათი თქმით, ქართული ოცნება ციხეში მყოფი ადამიანის ბედით სპეკულირებს და ამომრჩევლის დაშინებით არის დაკავებული.

მთაწმინდის საარჩევნო ოლქში მეორე ტური ლადო კახაძესა და შალვა შავგულიძეს შორის იმართება. პირველ ტურში ქართული ოცნების კანდიდატმა, ვლადიმერ კახაძემ ხმების 41 პროცენტი (6 036 ხმა) მიიღო, მისმა კონკურენტმა თავისუფალი დემოკრატებისა და ევროპული საქართველოს საერთო კანდიდატმა, შალვა შავგულიძემ — 36,83% (5 422 ხმა).