მთაწმინდის მე-17 უბანთან მომხდარ ინციდენტზე შინაგან საქმეთა სამინისტრომ გამოძიება 151-ე, მუქარის მუხლით დაიწყო. საქმე ეხება ევროპული საქართველოს მიერ გავრცელებულ ვიდეოს, რაზეც პარტია აცხადებს, რომ ამომრჩეველზე ზეწოლა ხორციელდებოდა.

შსს-ს ცნობით, ინციდენტში მონაწილე მხარეები ვერის პოლიციაში გამოკითხვაზე არიან გადაყვანილი. შსს-ში განმარტავენ, რომ შეტყობინება ევროპული საქართველოსგან მიიღეს.

ევროპულმა საქართველომ გაავრცელა ვიდეო, რომელზეც ქართული ოცნების მხარდამჭერი დავით იმნაძეა ასახული. პარტიის წევრის ირმა ნადირაშვილის მტკიცებით, მან მაისური გამოიცვალა და მე-17 უბანზე ისევ ცდილობს ამომრჩეველზე ზეწოლა მოახდინოს. მისივე განცხადებით, ყველგან კრიმინალური ელემენტები დგანან ქართული ოცნების ხელისუფლების ოფიციალურ წარმომადგენლებთან ერთად.