უსახლკარო ლეკვს, რომელიც რამდენიმე დღის წინ გორის მიმდებარე ტერიტორიაზე ავტოგასამართ სადგურებთან დაბოდიალობდა, მზიან კალიფორნიაში სახლი, ხოლო ჰოლივუდში — როლი ელოდება.

ჯორჯი საქართველოში სამოგზაუროდ ჩამოსულმა წყვილმა, ჯულიანა და შეიმას დევერებმა გზაზე მაშინ იპოვეს, როდესაც თბილისიდან მანქანით ბათუმში მიდიოდნენ. დევერები მსახიობები არიან, რომლებიც ABC-ის სერიალში Castle მონაწილეობენ.

ჯულიანამ, თავდაპირველად, ლეკვის ფოტოები ტვიტერზე გამოაქვეყნა და გამომწერებს ჰკითხა, ხომ არ იშვილებდნენ საყვარელ ცუგას, რომელიც დაახლოებით 4 თვის იყო.

ფოტო: Juliana Dever

ისინი ასევე დაუკავშირდნენ საქართველოში არსებულ ორგანიზაციას, Dog organization Georgia, და დახმარება სთხოვეს, მოგვიანებით კი ძაღლი ორგანიზაციის თავშესაფარში გადაიყვანეს.

"მადლობა სიკეთისთვის და გულისხმიერებისთვის ჯულიანას, შეიმასს, სარას და ჯეინს, ლეკვი ჩვენთანაა და უსაფრთხოდ. მას აღარასდროს შეაწუხებს შიმშილი და არც ქუჩებში მოუწევს ხეტიალი", — წერდა ორგანიზაცია თავის ფეისბუქის გვერდზე.

ბოლო ცნობებით კი, ლეკვისთვის სახლი უკვე ნაპოვნია:

"გაიცანით ჯორჯი. ეს საყვარელი ლეკვი გორიდან მალე კალიფორნიაში წავა და სერიალის ერთ-ერთი გმირი გახდება".

ჰოლივუდში წასვლამდე, ლეკვმა კამერასთან სინჯები გაიარა. ის რუსთავი 2-ის რეპორტაჟში გადაიღეს.

ფოტო: Dog organization Georgia