სამეფო კლუბი, რომელშიც მონარქიის აღდგენის მსურველები არიან გაწევრიანებულები 7 წლის უფლისწულის, გიოორგი ბაგრატიონის გამეფებას გეგმავენ. მათ დღეს პრეზენტაცია გამართეს და განმარტეს, რომ არასრულწლოვან უფლისწულს რეგენტთა საბჭო გაუწევს კონსულტაციას.

გიორგი ანა-ბაგრატიონ გრუზინსკისა და დავით-ბაგრატიონ მუხრანელის შვილია. სამეფო კლუბის წევრები აცხადებენ, რომ "დაზიანებულ კანდიდატს" საზოგადოებას არ შესთავაზებენ. მათი თქმით, მეფე მაგალითი უნდა იყოს, დავით-ბაგრატიონ მუხრანელმა კი მეფობის შანსი დაკარგა. ამის შესახებ მათ რუსთავი 2-თან ისაუბრეს.

სამეფო კლუბის წევრი დავით კლდიაშვილი ამბობს, რომ მეფე იქნება "ისტორის წარმომადგენელი" და არ იქნება დაპირისპირებული რომელიმე პოლიტიკურ ძალასთან. ერთ-ერთი წევრი ირაკლი დათუკიშვილი კი ამბობს, რომ მეფე უნდა იყოს მართლმადიდებელი, უნდა ჰქონდეს წაკითხული ვეფხისტყაოსანი და მაგალითს აძლევდეს ხალხს.

"როგორც ერეკლე მეფეს, მაგალითად, ექიმმა რჩევა მისცა, რომ ქათმის ბულიონი მიეღო და რას ამბობო, ქათმის ბულიონი რომ მარხვაში შევჭამოო, ხალხისთვის რა მაგალითი იქნებაო. აი, ასეთი მაგალითებით", — ამბობს დათუკიშვილი.

დავით-ბაგრატიონ მუხრანელის ადვოკატი ზაზა ჩხეიძე ამბობს, რომ გიორგი ბაგრატიონი გაიზარდა იმ შეგნებით, რომ პრინცია და ის მზად არის მეფობისთვის.

ანა ბაგრატიონ-გრუზინსკიმ ყოფილი ქმარი ფიზიკურ ძალადობაში დაადანაშულა. გარდა ამისა, მან დავით-ბაგრატიონ მუხრანსკის სასამართლოში უჩივლა ქონების გაყოფის მოთხოვნით. ასევე, ითხოვდა დნმ-ის ანალიზს იმის დასამტკიცებლად, რომ დავით ბაგრატიონ-მუხრანსკმა გვარი მიითვისა და ის სამეფო კარის წარმომადგენელი არ არის. ამ საქმის წარმოება სასამართლომ შეწყვიტა.