თბილისის საქალაქო სასამართლომ ანა და ნუგზარ ბაგრატიონ-გრუზინსკების სარჩელის განხილვა შეწყვიტა. დღეს, 11 აპრილს სასამართლოში არსებითი განხილვა უნდა დაწყებულიყო, თუმცა სამი მოსამართლისგან შემდგარმა კოლეგიამ სარჩელის განხილვაზე ბაგრატიონ-გრუზინსკებს უარი უთხრა.

ანა და ნუგზარ ბაგრატიონ-გზრუზინსკები ყოფილ სიძეს, დავით ბაგრატიონ-მუხრანელს სამეფო ტიტულის უნებართვო გამოყენებაში ედავებოდნენ. ბაგრატიონ-გრუზისნკები ამბობდნენ, რომ ისინი არიან სამეფო გვარის ძირითადი შტო, შესაბამისად სამეფო ტახტის მემკვიდრეები, რასაც ბაგრატიონ-მუხრანელის მხარე ეწინააღმდეგება.

დავით ბაგრატიონ-მუხრანელის ადვოკატი, ლევან ჩხეიძე ამბობს, რომ სასამართლოს საქმის განხილვა უნდა შეეწყიტა, რადგან მოწინააღმდეგეს არ აქვს იურიდიული ინტერესი და დავის საგანი არ არსებობდა.

"კონსტიტუციაში არ არსებობს არისტოკრატიული ტიტულები, შესაბამისად ამ არისტოკრატიული ტიტულების დაცვის საფუძველი აბსურდულია", — განაცხადა ადვოკატმა.

სამეფო ტიტულის გარდა ანა ბაგრატიონ-გრუზინსკი ყოფილ ქმარს ძალადობას მის მიმართ ჩადენილ ძალადობას ედავება, რაზეც შინაგან საქმეთა სამინისტრომ გამოძიება უკვე დაიწყო. ბაგრატიონ-გრუზინსკი და დავით ბაგრატიონ-მუხრანელი 2009 წელს დაქორწინდნენ და ოთხი წლის შემდეგ განქორწინდნენ.

შესაძლო ძალადობასთან დაკავშირებით ანა ბაგრატიონის ადვოკატმა, ლევან გორელაშვილმა პირველად ნანუკა ჟორჟოლიანის შოუში ისაუბრა. მან აღნიშნა, რომ 2014 წელს ანა ბაგრატიონს ყოფილი ქმარი ფიზიკურად არასრულწლოვანი შვილის თანდასწრებით გაუსწორდა. ადვოკატის თქმით, მისი კლიენტის დაზიანებები აღნიშნულია სამხარაულის ექსპერტიზის დასკვნაში.

დავით ბაგრატიონ-მუხრანელის ადვოკატი, ლევან ჩხეიძე ბრალდებებს უარყოფს და მას "შავ პიარკამპანიას უწოდებს". მისივე თქმით, ძალადობის არსებობის შემთხვევაშიც საქმეს ხანდაზმულობის ვადა აქვს გასული.