შინაგან საქმეთა მინისტრი გიორგი გახარია აცხადებს, რომ ხორავას ქუჩაზე მომხდარი მკვლელობა რთული გამოსაძიებელი იყო, რადგან არასრულწლოვანების მიერ ჩადენილ მძიმე დანაშაულს ეხებოდა. მისი თქმით, სააპელაციო სასამართლოს გადაწყვეტილების დასაბუთების გამოქვეყნების შემდეგ "ყურადღებით წაიკითხავენ" და "ძალიან სწრაფად იმოქმედებენ".

"ასეთი საქმე გამოძებაში შეიძლება იყოს წლობით. რა თქმა უნდა, ეს გამამართლებელი არავისთვის არ არის, თუმცა ის განაჩენი, რომელიც დღეს აპელაციაში დადგა ჩვენ გამოყოფილი საქმის ფარგლებში გვაძლევს საშუალებას თავიდან წავიკითხოთ ყველა გარემოებები ამ საქმის. იმისთვის, რომ გავითვალისწინოთ მოსამართლეების ის პოზიცია, რომელიც იქნება განმარტებით ნაწილში", — განაცხადა მინისტრმა.

დღეს, 3 მაისს სააპელაციო სასამართლომ ბრალდებული გ.ჯ დამნაშავედ ცნო დავით სარალიძის ჯგუფურ მკვლელობაში დაუდგენელ პირებთან ერთად. ამ გადაწყვეტილებით მოსამართლეთა პალატამ ნაწილობრივ შეცვალა საქალაქო სასამართლოს გადაწყვეტილება და ნაწილობრივ გაიზიარა ბრალდების მხარის პოზიცია.

საქალაქო სასამართლოს გადაწყვეტილებით, გ.ჯ. მსჯავრდებული იყო დავით სარალიძის დამამძიმებელ გარემოებაში მკვლელობის მცდელობისთვის და 10 წლითა და 6 თვით თავისუფლების აღკვეთა ჰქონდა შეფარდებული. სააპელაციო სასამართლოს გადაწყვეტილებით, არასრულწლოვანთა მართლმსაჯულების კოდექსის თანახმად, გ.ჯ.-ს სასჯელის სახით განესაზღვრა თავისუფლების აღკვეთა 11 წლითა და 3 თვის ვადით.

რაც შეეხება გ.ბ.-ს, სააპელაციო სასამართლოს გადაწყვეტილებით, გ.ბ.-ს მომაწილეობა არ მიუღია დავით სარალიძის მკვლელობაში. სააპელაციო სასამართლომ ძალაში დატოვა საქალაქო სასამართლოს გადაწყვეტილება ლევან დადუნაშვილის მკვლელობასთან დაკავშირებით და დამნაშავედ ცნო გ.ბ. მას სასჯელი დაუმძიმდა და პატიმრობად 11 წელი და სამი თვე განესაზღვრა.

ხორავას ქუჩაზე ორი არასრულწლოვანი 2018 წლის პირველ დეკემბერს მოკლეს. გიორგი გახარიამ გამოძიების დაწყებიდან 4 დღის შემდეგ განაცხადა, რომ "დანაშაულში მონაწილე ყველა პირი დადგენილი და დაკავებულია".

შვილმოკლული მამა ზაზა სარალიძე ამტკიცებდა, რომ მისი შვილის მკვლელობაში დამნაშავეს შსს და პროკურატურა ხელს აფარებდა. ამ საქმეზე შექმნილი იყო პარლამენტის სპეციალური საგამოძიებო კომისია. შინაგან საქმეთა სამინისტრომ კი გამოძება გამოყოფილი საქმის ფარგლებში გააგრძელა.

გაიგე მეტი: 1 წელი ხორავას ქუჩის ტრაგედიიდან — მოკლედ