საერთაშორისო გამჭვირვალობა — საქართველოს ხელმძღვანელი, ეკა გიგაური ამბობს, რომ უზენაესი სასამართლოს მოსამართლეობის მსურველებს შორის გენერალური პროკურორის, შალვა თადუმაძისა და მისი მოადგილის გამოჩენა გასაკვირია. გიგაურის თქმით, თადუმაძის შესვლა უზენაეს სასამართლოში ნიშნავს, რომ მმართველ პარტიას გავლენის მოპოვება სურს.

"განსაკუთრებით საინტერესოა ბოლოს და ბოლოს გამოაჩენს თუ არა თავის დიპლომს. რვა თვეა ვდაობთ სასამართლოში, რომ დიპლომის ასლი წარმოადგინოს. ამ პროცესიდან ერთ-ერთი დადებითი შეიძლება ეს დავინახოთ", — განუცხადა გიგაურმა On.ge-ს.

რაც შეეხება მოსამართლეობის სხვა მსურველებს, გიგაური ამბობს, რომ სიაში ბევრია ე.წ. ჩინჩალაძე-მურუსიძის კლანთან დაახლოებული პირი. გარდა ამისა, ის აღნიშნავს, რომ კონკურსში ბევრმა ცნობილმა და ღირსეულმა იურისტმა მონაწილეობა არ მიიღო.

"ეს პროცესი, რაც ვითარდებოდა უზენაესი სასამართლოს კონკურსთან დაკავშირებით მიუთითებდა იმაზე, რომ აქ გათვალისწინებული იქნებოდა, პირველ რიგში, კლანის ინტერესები და ამ კლანს ზურგს უმაგრებდა ქართული ოცნება და პირადად ბიძინა ივანიშვილი. ამიტომ ცხადია, ამ ადამიანებს არ ჰქონდათ განცდა იმისა, რომ ეს იქნებოდა გამჭვირვალე პროცესი".

გიგაურის თქმით, ახლა მთავარი პასუხისმგებლობა პარლამენტზეა თუ ვის აირჩიეს უზენაესი სასამართლოს მოსამართლედ.

უზენაესი სასამართლოს მოსამართლეობის სურვილი 144-მა პირმა გამოთქვა. იუსტიციის უმაღლესმა საბჭომ მსურველთა სია გამოაქვეყნა. მსურველებს შორის არიან იუსტიციის უმაღლესი საბჭოს მდივანი გიორგი მიქაუტაძე, გენერალური პროკურორი შალვა თადუმაძე და საკონსტიტუციო სასამართლოს თავმჯდომარე ზაზა თავაძე. გარდა ამისა, უზენაესის მოსამართლეობა სურს თბილისის სააპელაციო სასამართლოს უვადო მოსამართლე თამარ ალანიას.

ძველი ათკაციანი სიიდან სიაში წარმოდგენილი არ არიან თბილისის სააპელაციო სასამართლოს თავმჯდომარე მიხეილ ჩინჩალაძე და იუსტიციის საბჭოს მოსამართლე წევრი დიმიტრი გვრიტიშვილი. გარდა ამისა, ძველი სიიდან მსურველებს შორის არიან მარიამ ცისკაძე, ნინო ქადაგიძე, პაატა სილაგაძე, მერაბ გაბინაშვილი. ნინო სამნიძე და გიორგი თავაძე მონაწილეობას აღარ იღებენ.