ქართული ოცნების დეპუტატი პარლამენტში, მერაბ ქვარაია ოპოზიციის წევრებს ეუბნება, რომ მათ კითხვების დასმის უფლება აქვთ, მაგრამ ყველა კითხვა არ უნდა დასვა. დეპუტატი გაღიზიანდა ოპოზიციის წევრების კითხვების გამო, რომელიც ოთხოზორია-ტატუნაშვილის სიას ეხებოდა. მერაბ ქვარაიას თქმით, სიასთან დაკავშირებით ოპოზიციის დეპუტატები გაუგებარ და მიუღებელ კითხვებს სვამენ.

"ის პოლიტიკა, რომელსაც აწარმოებს ჩვენი ხელისუფლება, არის ყველაზე მწყობრი სამშვიდობო პოლიტიკა, რომელმაც აწია სტაბილურობისა და უსაფრთხოების განცდა. მოგწონთ ეს თუ არა, ეს არის რეალობა. ყოველი კითხვა, რომელიც ისმება ამ დარბაზში საქართველოს პრემიერის თუ სხვა მაღალ თანამდებობის პირის მიმართ, უნდა იყოს კარგად აწონილი-დაწონილი და გაფილტრული. ყველა კითხვის დასმა აქ არის მიუღებელია, გაქვთ ამის უფლება, მაგრამ ყველა კითხვის დასმა არის მიუღებელი", — განაცხადა დეპუტატმა.

დღეს, 31 მაისს ინტერპელაციის ფორმატის ფარგლებში პარლამენტის პლენარულ სხდომაზე, პრემიერ-მინისტრ მამუკა ბახტაძეს უსმენენ. ევროპული საქართველოს დეპუტატებმა პრემიერს რამდენჯერმე ჰკითხეს, თუ რატომ არ გაფართოვდა სია და რატომ არ შევიდნენ სიაში რუსეთის მოქალაქეები. მამუკა ბახტაძემ აღნიშნა, რომ იმ ადამიანების ბრალეულობის სტანდარტი, რომლებიც სიაში შევლენ, ძალიან მაღალი უნდა იყოს, რათა საერთაშორისო თანამეგობრობას აღნიშნული სანქციების რეალურ ცხოვრებაში გატარების საშუალება ჰქონდეს.