ქუთაისის საკრებულოს თავმჯდომარე, ნიკოლოზ ლატარია ამბობს, რომ ნანა კოსტავასთან ერთად მუშაობას არ აპირებს. ლატარია აცხადებს, რომ კოსტავას ურჩია, საკრებულო დატოვოს. მან გუშინ, 30 მაისს On.ge-სთან აღნიშნა, რომ კოსტავას შეხვდა და დეპუტატმა მას უთხრა, რომ არ იცოდა ამ ტრაგედიის შესახებ.

"ჩვენ რა ბერკეტიც გვქონდა, გამოვიყენეთ და ის გადაყენებულია ფრაქციის თავმჯდომარის პოსტიდან. მე მას ვურჩიე დაეტოვებინა საკრებულო, თუმცა, უნდა დაველოდოთ მის გადაწყვეტილებას. მისი საკრებულოდან გაშვების ბერკეტი ჩვენ არ გვაქვს, თუმცა, პირადად მე არ ვაპირებ მასთან ერთად საკრებულოში ვიმუშაო", — ამბობს საკრებულოს თავმჯდომარე.

ნანა კოსტავა დღეს, 31 მაისს ქართულმა ოცნებამ ფრაქციის თავმჯდომარეობიდან მოხსნა. თუმცა, ის დეპუტატის მანდატს მაინც ინარჩუნებს. ის ქუთაისის გენდერული თანასწორობის საბჭოდანაც გარიცხეს.

ქუთაისის საკრებულოს დეპუტატმა, ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

ამავე თემაზე: