ადამიანის უფლებათა დაცვის კომიტეტის თავმჯდომარემ, სოფო კილაძემ ქუთაისის საკრებულოს დეპუტატის, ნანა კოსტავას პოსტი დაგმო. კილაძემ იმედი გამოთქვა, რომ "ასეთი ტიპის არაადამიანური გამოვლინებები არ იქნება არასდროს, განსაკუთრებით მმართველი გუნდის წევრებისგან".

"შეიძლება ჩვენ მოგვწონდეს ან არ მოგვწონდეს კონკრეტული ადამიანი, მაგრამ როდესაც ეს ადამიანი ასეთ ენით აღუწერელ ტრაგედიაში არის, აქ აბსოლუტურად ყველა ადამიანს, მით უფრო მმართველი გუნდის წარმომადგენელს ელემენტარული ადამიანობა მოეთხოვება, ამიტომ, ეს პირი გადააყენეს", — თქვა კილაძემ.

ქუთაისის საკრებულოს დეპუტატმა, ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

დღეს, 31 მაისს ქართულმა ოცნებამ ნანა კოსტავა ფრაქციის თავმჯდომარეობიდან მოხსნა. თუმცა, ის დეპუტატის მანდატს მაინც ინარჩუნებს.

ამავე თემაზე: