მოქალაქის მიერ გამართულ ეკონომიკურ ფორუმზე, ბიძინა ივანიშვილმა განაცხადა, რომ 4 წლის განმავლობაში, ქართული ოცნების ხელისუფლების სათავეში ყოფნის პერიოდში, ქვეყნაში მხოლოდ 60 ათასი სამუშაო ადგილი შეიქმნა, თუმცა იმისთვის, რომ ძირეული გარდატეხა მომხდარიყო 600 ათასი უნდა შექმნილიყო:

"ეს ძირეულ გარდატეხას ვერ მოახდენდა, ძირითადი მასა ისევ გაჭირვებულია და რთულია აუხსნა მათ, ის პრინციპული გარდაქმნები, რაც მოხდა. როგორც უჭირდა ძალიან ბევრს, ისე უჭირთ. მაგრამ ეს მთავრობის ბრალი არ არის. ეს ჩვენი უახლოესი ისტორიის შედეგია. 25-30 წელიწადი არ მაქვს მხედველობაში, საბჭოთა კავშირიც გავიხსენოთ. როგორ დაიშალა და გაჩერდა ყველაფერი. მაგრამ კვირიკაშვილი და მისი მთავრობა დავადანაშაულოთ და ვერ გავაკეთოთ სწორი ანალიზი, ეს დანაშაული იქნება. ჩემი აზრით, მე რომ დავდივარ [რეგიონებში] და ვუხსნი, რომ მოხდა ძალიან მკვეთრი გარდაქმნები, ეს ჩემი ვალია. ასეთი დიდი კონტრასტი, რაც 4 წლის განმავლობაში მოხდა - რა იყო, სად ვიყავით და პატრიარქის სიტყვებსაც ვიშველიებ, რომ უფსკრულის პირად ვიდექით. ვერცერთი ბიზნესმენი დღეს ვერ იტყვის, რომ თქვენს საკუთრებას ვინმეს უთვალთვალებს და ვინმე აპირებს თქვენს ჯიბეში ჩაძრომას".

ეკონომიკურ ფორუმს ეკონომისტები, ბიზნესმენები და რამდენიმე პოლიტიკური პარტიის წარმომადგენელი ესწრება.