კულინარიის მოყვარულებისთვის რუსთავი 2-ის ეთერში ახალი გადაცემა, სამზარეულოს ომები იწყება.

გადაცემა უცხოური შოუს ქართული ანალოგი არაა — მისი ფორმატი ფორმულა კრეატივმა შეიმუშავა.

თითოეულ გადაცემაში ერთმანეთს ორი გუნდი შეეჯიბრება. მზარეულები თანაბარ პირობებში, ერთმანეთის პარალელურად დაიწყებენ კერძების მომზადებას. მათ თითოეულ ქმედებას ჟიური შეაფასებს და ხმათა უმრავლესობით გადაწყვეტს, თუ ვინ გადავა შემდეგ ეტაპზე. დრამატული და დაძაბული შერკინების დროს სხვა უნარებთან ერთად ჟიური გუნდური მუშაობის ჩვევებსაც დააკვირდება, დამარცხებული გუნდი კი შოუს ავტომატურად გამოეთიშება.

ჟიურის წევრები ნიკა გვარამია, გურამ ბაღდოშვილი და მიშა ავსაჯანიშვილი იქნებიან. ქართველი ტელემაყურებლებისთვის ახალი სახე, მიშა ავსაჯანიშვილი სპეციალურად სამზარეულოს ომებისთვის ჩამოვიდა კიევიდან, სადაც 12 რესტორნის ბრენდშეფად მუშაობს.

რაც შეეხებათ მონაწილეებს, 2-თვიანი კასტინგის შემდეგ სამზარეულოს ომებისთვის 16 წყვილი შეირჩა.

"საუკეთესო, ყველაზე გამბედავი და ამბიციური", — ასე ახასიათებენ მონაწილეებს შოუს პროდიუსერები.

გამარჯვებული წყვილი ქვეყნის საუკეთესო მზარეულის ტიტულთან ერთად უპრეცენდენტო პრიზს მიიღებს: ორ ბინას კომპანია მეგა ქონსთრაქშენისგან.

სამზარეულოს ომების პრემიერა არხზე 10 ივნისს, 22:00 საათზე შედგება. როგორც ჩანს, წინ ცხელი და სამზარეულოს დრამებით დატვირთული ზაფხული გველის.