რესპუბლიკელების წევრი, ლევან ბერძენიშვილი დავით უსუფაშვილის მიერ გამოქვეყნებულ წერილს ეხმაურება და განმარტავს, რომ ბიძინა ივანიშვილი მატყუარაა:

"ქვეყანას ამდენი მატყუარა არ ჰყავს, ქვეყანას ჰყავს ახლა ერთი მატყუარა. არ ვიცი, რატომ აიკვიატა ეს ამბავი, რატომ ტყუის ბიძინა ივანიშვილი, მაგრამ ამ დოკუმენტიდანაც კარგად ჩანს სინამდვილეში, როგორი იყო ურთიერთობები. იყო პარტნიორული ურთიერთობები, იყო მცდელობა მათი მხრიდან, რესპუბლიკელების და ქართული ოცნების ორპარტიული კოალიციის შექმნისა და სხვებიც მიიღებდნენ მონაწილეობას, მაგრამ ღერძი პარტიები ეს იქნებოდა, ამის შესახებ როდესაც ბიძინა ივანიშვილი ამბობს, რომ რას ამბობ რესპუბლიკელებს როგორ დავავალებდი რამესო - არის დოკუმენტი, რომელიც ამტკიცებს, რომ დიახ, ავალებდა, თხოვდა, აინტერესებდა ჩვენთან ერთად საქმეების კეთება და გაგვიკეთებია ადრე. ახლა რატომ ტყუის, არ ვიცი, უბრალოდ დოკუმენტებთან ბრძოლა ძნელია".

ბერძენიშვილი აცხადებს, რომ ქართული ოცნება პროდასავლური პარტიის შთაბეჭდილებას არ ტოვებს, ხოლო ივანიშვილის ღია შეტევა რესპუბლიკელებზე გამოიწვია იმან, რომ ამ მიმართულებით ქართული ოცნების მიმართ უამრავი კითხვა არსებობს:

"ცხონებული შევარდნაძე რომ ცოცხალი იყოს, ახლა ხომ ამ სიაში იქნებოდა. სადაც ნარჩემაშვილი, შევარდნაძიდან კუბური ფესვი მოხვდა სიაში, რამენაირად თვითონაც მოხვდებოდა. ამის გამო შეიქმნა შთაბეჭდილება დასავლეთის მხრიდან, რომ ეს არ არის მთლად პროდასავლური ძალა. ვფიქრობ, ბიძინა ივანიშვილი ცდილობს ახლა დასავლური ძალები მოსპოს, რათა თავისი ერთადერთობა და განუმეორებლობა დაუმტკიცოს ჩვენს დასავლელ პარტნიორებს".

22 სექტემბერს დავით უსუფაშვილმა მის მიერ ბიძინა ივანიშვილისა და გიორგი კვირიკაშვილისთვის 11 მარტს მიწერილი წერილი გაასაჯაროვა, რომელშიც მათ 2015 წლის გაზაფხულის მიღწეულ შეთანხმებას ახსენებს, რომ კოალიცია საარჩევნო რელსებზე 2015 წლის 1 სექტემბრიდან უნდა გადაეყვანათ. ამასთან, უსუფაშვილი კოალიციაში შექმნილ პრობლემებს მიმოიხილავს და მათთან შესახვედრად მზადყოფნას გამოთქვამს.