გაერთიანებული ოპოზიციის ლიდერმა, გიორგი ვაშაძემ საარჩევნო უბნების დახურვის შემდეგ ბრიფინგი გამართა და თქვა, რომ "რაც მთავარია, ძალიან კარგ ხასიათზე არიან".

გიორგი ვაშაძემ აღნიშნა, რომ მათი მონაცემებით დამაჯერებელი უპირატესობა აქვთ ზუგდიდში, სადაც პირველივე ტურში გამარჯვებას ვარაუდობენ. მეორე ტურს ელოდებიან რამდენიმე რაიონში.

"ვიწყებთ სტრატეგიას, რომელზეც დიდხანს გვაქვს ნამუშევარი - სტრატეგია რიგითი ბიულეტენის გადასარჩენად. შეგახსენებთ საპრეზიდენტო არჩევნების მეორე ტურს, იგივე ზუგდიდში, სადაც 1 500 ბიულეტენი გააბათილა ქართულმა ოცნებამ. ჩვენ არ უნდა დავუშვათ, რომ რომელიმე ბიულეტენი ტყუილად გააბათილონ. მათი დავალებაა ისევ და ისევ, რომ გადაყარონ ჩვენი ბიულეტენები ბათილ ბიულეტენებში და ხმები დაგვაკლონ", — თქვა გიორგი ვაშაძემ.

მისი აზრით, "ახლა უფრო აქტიური და რთული პროცესი იწყება".