დღეს, 19 მაისს გამართული პარლამენტის შუალედური, მუნიციპალიტეტების მერების რიგგარეშე და საკრებულოების შუალედური არჩევნები წინა არჩევნებთან შედარებით ბევრად სახალისო და სანახაობრივი გამოდგა.

თუ მთავარ სიახლეებს თვალს არ ადევნებდით, შეგიძლიათ მხოლოდ ამ სტატიის გადაკითხვით გაიგოთ ყველაფერი, რაც გჭირდებათ:

დავიწყოთ საარჩევნო პროცესის განუყოფელ ატრიბუტად ქცეული სიებით, რომელთა დახმარებითაც კოორდინატორები ამომრჩევლებს აღრიცხავენ ხოლმე. არჩევნებიდან არჩევნებამდე ამ სიებს მნიშვნელობა მფლობელების წარმოსახვის უნარის შესაბამისად ეცვლებათ ხოლმე:

1. ზუგდიდში მოქალაქემ, რომელიც საარჩევნო უბანთან სიებით იდგა, თქვა, რომ დისერტაციას იცავდა

ფოტო: კადრი ვიდეოდან

მოქალაქე გიორგი კალანდიამ, რომელიც ზუგდიდის სოფელ ჯიხაშკარის #76-ე საარჩევნო უბანთან სიებითა და საბუთებით იდგა, თქვა, რომ დისერტაციას იცავდა. მისი განცხადებით, ის დამკვირვებელი არ არის და უბრალოდ რაღაცებს ინიშნავს. მან ჟურნალისტებს სიები და საბუთები არ აჩვენა.

2. ზესტაფონში კოორდინატორმა ჟურნალისტებს უთხრა, რომ თან ცოდვების სია ჰქონდა, რომელსაც აღსარებისთვის აგროვებდა

ფოტო: კადრი TV პირველის ვიდეოდან

ზესტაფონის ერთ-ერთ საარჩევნო უბანთან მდგომმა ქალმა, რომელსაც ხელში ფურცლები ეჭირა, თქვა, რომ თან ცოდვების სია ჰქონდა. მისი მტკიცებით, ცოდვების სიას აღსარებისთვის აგროვებდა.

3. კიდევ ერთი შემთხვევა ზესტაფონში: საარჩევნო უბანთან ქალმა თქვა, რომ თან დაბადების დღის სია ჰქონდა

ფოტო: კადრი ვიდეოდან / TV პირველი

ზესტაფონში ერთ-ერთმა მოქალაქემ თქვა, რომ მას ხელში არა ამომრჩევლის სია, არამედ თავისი დაბადების დღის სია ეჭირა. მისი მტკიცებით, ის ორ დღეში 80 წლის ხდება.

4. ზუგდიდში ქალმა, რომელსაც სიები აღმოუჩინეს, ყურადღების გაფანტვის ტექნიკა გამოიყენა და ჟურნალისტებს დალოცვა დაუწყო

ფოტო: კადრები აჭარის ტელევიზიის ვიდეოდან

ზუგდიდის ერთ-ერთ საარჩევნო უბანთან, სავარაუდოდ, ქართული ოცნების კოორდინატორმა, რომელსაც სიები აღმოუჩინეს, ჟურნალისტებს დალოცვა დაუწყო. დალოცვის შემდეგ ჟურნალისტმა მას ჰკითხა: "ქრისტე აღსდგა ქალბატონო, მაგრამ ოპოზიციამ რა დაინახა?" რაზეც ქალმა უპასუხა, რომ სიები არ აქვს.

5. მარნეულში კაცი ამტკიცებდა, რომ საარჩევნო უბანზე "ზაგრის" მისაღებად იდგა

ფოტო: კადრი ვიდეოდან

კაცი ამტკიცებდა, რომ მარნეულის ერთ-ერთ საარჩევნო უბანთან "ზაგრის" მისაღებად იდგა. "ვიზაგრებოდით, შემოგევლე. სეზონია გახსნილი", — თქვა მან.

ჩვენს გასამხიარულებლად მცდელობა არც პოლიტიკოსებმა დააკლეს:

6. ხულოში მერობის კანდიდატს პირადობის მოწმობა სახლში, პიანინოზე დარჩა

ფოტო: აჭარის ტელევიზია

ხულოში საარჩევნო უბანზე მისულ გაერთიანებული ოპოზიციის მერობის კანდიდატს, ირაკლი ჯორბენაძეს პირადობის მოწმობა სახლში, პიანინოზე დარჩა. ამ მიზეზით მან ხმა 15 წუთის განმავლობაში ვერ მისცა.

7. კახა კალაძემ კოორდინატორები გაამხნევა და მოუწოდა, ჟურნალისტების არ შეშინებოდათ

ფოტო: ქართული ოცნება

ქართული ოცნების გენერალურმა მდივანმა, კახა კალაძემ კოორდინატორებს მოუწოდა, ჟურნალისტების არ შეშინებოდათ და საქმიანობა გაეგრძელებინათ.

კონფლიქტებიც კომიკური მიზეზით იწყებოდა:

8. ზუგდიდში მოქალაქეებმა პირველი ამომრჩევლის სტატუსისთვის იჩხუბეს

ფოტო: კადრი აჭარის ტელევიზიის ვიდეოდან

ზუგდიდის #21-ე საარჩევნო უბანზე მოქალაქეებმა პირველი ამომრჩევლის სტატუსისთვის იჩხუბეს. კაცმა თქვა, რომ უბანზე სპეციალურად მივიდა დილის 7-ის ნახევარზე, რათა ხმა პირველს მიეცა. ხოლო ქალი, რომელმაც მას ხმის მიცემა დაასწრო, 8-ის ნახევარზე. ადგილზე სიტუაცია პოლიციამ განმუხტა.

არჩევნებზე მხოლოდ დამკვირვებლების იმედად ვერ იქნები ადამიანი:

9. ხმის მიცემის დროს ზუგდიდში საარჩევნო უბანი აკურთხეს

ფოტო: ლაივპრესი

ხმის მიცემის დროს ზუგდიდის მეხუთე საარჩევნო უბანი აკურთხეს და კომისიის წევრები დალოცეს. ვლაქერნის ღვთისშობლის ხატის სახელობის ეკლესიის მოძღვარმა განაცხადა, რომ "ეს ჯერ პირველი უბანი" იყო და 20 საათამდე "რამდენ ადგილსაც მოასწრებდა", იმდენს აკურთხებდა. მოგვიანებით, ზუგდიდის საარჩევნო უბნის კურთხევის შემდეგ ორი დამკვირვებელი გააძევეს.

10. გოგი წულაიამ თქვა, რომ ცესკოს შედეგები არ აინტერესებს და არჩევნების დასრულებამდე ორი საათით ადრე თავი ზესტაფონის მერად გამოაცხადა

ფოტო: კადრი ვიდეოდან / იბერია

თავისუფალი საქართველოს ზესტაფონის მერობის კანდიდატმა, გოგი წულაიამ არჩევნების დასრულებამდე ორი საათით ადრე თავი ზესტაფონის მერად გამოაცხადა. მისი განცხადებით, ის "ამათ ჩატარებულ" არჩევნებს არ ენდობა.

ბონუსი: ასე გამოვიყურებით ჟურნალისტები დღის ბოლოს