ეროვნული ნაციონალური ბალეტის ხელმძღვანელმა, ილიკო სუხიშვილმა განაცხადა, რომ კარგი იქნება თუ ყოველ წელს 17 მაისს კონცერტები დაიგეგმება. ამის შესახებ მან ოჯახის სიწმინდის დღეზე განაცხადა, რომელიც პატრიარქმა ჰომოფობიასა და ტრანსოფობიასთან ბრძოლის დღის საპირწონედ დააარსა.

"ყოველ წელს მივუძღვნათ ქვეყანას და ვაჩუქოთ ხალხს ერთი კომპოზიცია, კარგი იქნებოდა", — განაცხადა მან პირველ არხთან საუბრისას.

დღეს ეროვნულმა ნაციონალურმა ბალეტმა ოჯახის სიწმინდის დაცვის დღისადმი მიძღვნილ ღონისძიებაზე იცეკვა. როგორც ილიკო სუხიშვილმა აღნიშნა, სპეციალურად ამ დღისთვის მათ პირველად შეასრულეს ახალი ცეკვა "ფერხული".

17 მაისი ჰომოფობიასთან და ტრანსფობიასთან ბრძოლის საერთაშორისო დღეა. 2013 წლის 17 მაისს ძალადობრივმა ჯგუფებმა, მათ შორის ანაფორით შემოსილმა პირებმა მშვიდობიანი აქცია დაარბიეს. ამის შემდეგ საქართველოს მართლმადიდებელი ეკლესიის პატრიარქმა, ილია მეორემ 2014 წელს ეს დღე "ოჯახის სიწმინდის დღედ" გამოაცხადა.