მკვლევარი ჯეფრი მარში ათწლეულის განმავლობაში უამრავ ისტორიულ ოფიციალურ ჩანაწერს ზედმიწევნით იკვლევდა და ერთმანეთს უდარებდა. მისი მიზანი იმის გარკვევა იყო, თუ სად ცხოვრობდა შექსპირი 1590-იან წლებში.

2008 წელს დედოფალ ელისაბედ I-ის ხანის თეატრი, The Theatre, აღმოსავლეთ ლონდონში, შორდიჩის ოლქში აღმოაჩინეს. აქ შექსპირი თეატრ გლობუსში მუშაობის დაწყებამდე მოღვაწეობდა. მარშს ზუსტად ის აინტერესებდა, თუ სად ცხოვრობდა დრამატურგი იმ პერიოდში, როცა მისი პიესები The Theatre-ში იდგმებოდა. ისტორიკოსის ძიებაც სწორედ აქედან დაიწყო.

აქამდე უკვე ცნობილი იყო, რომ შექსპირი ცენტრალურ ლონდონში, ლივერპულის ქუჩის სადგურის მიდამოებში, იმდროინდელ სეინტ ჰელენსის საგრაფოში ცხოვრობდა; ის 1597-1598 წლებში ამ დასახლების გადასახადების გადამხდელთა სიაში იყო მოხსენიებული. თუმცა, მისი ზუსტი საცხოვრებელი ადგილი აქამდე არავინ იცოდა.

1598 წლის სეინტ ჰელენსის საგრაფოს გადასახადების გადამხდელთა სიის ორიგინალი დოკუმენტი. უილიამ შექსპირის ხელმოწერა სიაში ბოლოა.

ფოტო: National Archives

მარშმა დაადგინა, რომ შექსპირი სახლს ქირაობდა შენობაში, რომელიც სეინტ ჰელენსის ეკლესიის ეზოს გადაჰყურებდა და ტყავით მოვაჭრეების კომპანიას ეკუთვნოდა.

მკვლევარისთვის გაკრული ხელით დაწერილი ისტორიული დოკუმენტების გარჩევა ერთგვარი გამოწვევა იყო. მიუხედავად ამისა, მარშმა მოახერხა, გაეანალიზებინა ეს "უჩვეულოდ კარგად" შემონახული ჩანაწერები, რომლებიც 1550-იანი წლებიდან მოყოლებული რამდენიმე ათწლეულის მონაცემებს იტევდა.

"ადგილი, სადაც შექსპირი ლონდონში სახლობდა, მეტად სიღრმისეულ წარმოდგენას გვიქმნის იმაზე, თუ რა შეიძლებოდა ყოფილიყო მისი შემოქმედებისა და ცხოვრების შთაგონების წყარო", – ამბობს მარში, რომელიც ვიქტორიასა და ალბერტის მუზეუმში თეატრისა და სპექტაკლების დეპარტმანეტის ხელმძღვანელიცაა, - "სტრატფორდიდან ლონდონში გადასახლების შემდეგ შექსპირი რამდენიმე წლის განმავლობაში ქალაქის ყველაზე მდიდრულ დასახლებაში ცხოვრობდა. ის გავლენიანი საზოგადო მოღვაწეების, მდიდარი საერთაშორისო ვაჭრების, წარმატებული ექიმებისა და პროფესიონალი მუსიკოსების გარემოცვაში აღმოჩნდა".

ისტორიკოსმა ჯეფრი მარშმა არქივში არსებული 1550-იანი წლებით დათარიღებული დოკუმენტები გამოიკვლია.

ფოტო: Paul Harries

ისტორიკოსის აზრით, ლონდონში დასახლება "შექსპირის გავლენას გააძლიერებდა და კარიერულ წინსვლაში დაეხმარებოდა. სწორედ ამ პერიოდში მან საგვარეულო გერბი მიიღო და სტრატფორდში მდიდრული სახლის შეძენასაც გეგმავდა".

ისტორიკოსი ჯეფრი მარშის აზრით, ეს უილიამ შექსპირის პორტრეტი გახლავთ. ამ ვარაუდმა საზოგადოებაში დიდი მითქმა-მოთქმა გამოიწვია, რაც კიდევ ერთხელ ადასტურებს იმას, თუ როგორ მნიშვნელოვან ლიტერატურულ ფიგურად რჩება დრამატურგი.

ფოტო: Peter Macdiarmid / Gett

ეს შექსპირის ყველაზე ცნობილი პორტრეტია, რომელიც 1623 წელს მისი ნაწარმოებების პირველ სრულ კრებულში, პირველ ფოლიოში გამოქვეყნდა.

ფოტო: Getty

გლობუსის თეატრის თანამედროვე რეკონსტრუქცია ორიგინალი თეატრის ადგილიდან რამდენიმე ასეულ მეტრში, 1997 წელს გაიხსნა. ის მაქსიმალურადაა მიახლოებული კონსტრუქციის თავდაპირველ სახესთან. ყოველწლიურად გლობუსის სცენაზე შექსპირის უამრავი პიესა იდგმება.

ფოტო: Oli Scarff / Getty

შექსპირთან დაკავშირებული არტეფაქტები ძალიან იშვიათი და ღირებულია. ამ სურათში ფრანგი ბიბლიოთეკარი რემი კორდონიე შექსპირის ძვირფას წიგნს პირველ ფოლიოს გვიჩვენებს. ესაა დრამატურგის რამდენიმე პიესის კრებული. პიესები 1623 წლიდან თარიღდებიან. როგორც ცნობილია, მსოფლიოს გარშემო სხვადასხვა ბიბლიოთეკის და კერძო პირის საკუთრებაში ამ წიგნის დაახლოებით 230 ასლი მოიპოვება.

ფოტო: Deni Charlet / AFP / Getty

შექსპირი ცენტრალურ ინგლისში მდებარე პატარა ქალაქში, ეივონის სტრატფორდში დაიბადა და გაიზარდა. დრამატურგის მშობლიური სახლი უამრავი მნახველის ყურადღებას იპყრობს, რის გამოც ქალაქში ტურიზმი დღემდე ჰყვავის. ყოველწლიურად, აპრილში შექსპირის დაბადების დღე აღლუმებითა და სხვა ღონისძიებებით აღინიშნება.

ფოტო: John James Photography

შექსპირის ეს ბიუსტი გარიკ ინის პაბში, ეივონის სტრატფორდში დგას. შენობა მეთხუთმეტე საუკუნით თარიღდება და ბევრის აზრით ის ქალაქში უძველესი პაბია.

ფოტო: Tracy You / CNN