დღეს, კახეთში ჩატარებულ გადაცემაში, შეხვედრები რეგიონულ მედიასთან, ყოფილმა პრემიერმა ბიძინა ივანიშვილმა განაცხადა, რომ ყველა "საშუალო ქართველი" ახერხებს ევროპაში მოგზაურობას და საქართველოში დაბრუნებულები მთავრობაზე ბრაზდებიან, რადგან იქ უკეთეს ცხოვრებას ნახულობენ, აქ კი, საკუთარ თავის დადანაშაულება არ სურთ:

"უამრავი გაჭირვებულია საქართველოში, ეკონომიკა 4-ჯერ, 5-ჯერ ჩამორჩება განვითარებულ ქვეყნებს, ჩვენ თავისუფლად ვმოგზაურობთ დღეს, ვიზალიბერალიზაცია არ მიგვიღია, მაგრამ დღეს საშუალო ქართველიც მოგზაურობს თავისუფლად ევროპაში. ხედავენ როგორ ცხოვრობენ ევროპელები და რა თქმა უნდა, უკმაყოფილოები არიან.

ადამიანს ძალიან უჭირს საკუთარი თავის დადანაშაულება, ერთ-ერთი ჩვენი თვისებაა ეს და იმას [მთავრობას] უწოდებს მამაძაღლს, სახლში მოდის და ნერვები ეშლება, დამნაშავე ვინაა? საკუთარი თავი არა.

ისტორიის ანალიზი ძალიან რთულია კაცისთვის, რა ეტაპები გავიარეთ ისტორიულად, 25-30 წელიწადი როგორი გვქონდა. ყველაზე იოლია აი მთავრობას დააბრალო, მაგრამ ასე იოლად თუ გავზომავთ, ჩვენზე უარესადაც ცხოვრობს ბევრი დღეს. ნახეთ რამდენი კონფლიქტია რეგიონში ხალხო, როგორ ოსტატურად ავერიდეთ ამდენ უბედურებებს.

ჩვენ გვქონდა უარესობა და ის, რომ 4 წელიწადში ვერ მოხერხდა ეკონომიკურად მოსახლეობის უმრავლესობის პირობები გაუმჯობესებოდა, ეს თავშივე გასაგები იყო, და ამაზე ანალიზის გაკეთება უჭირს და ვინაა დამნაშავე? მთავრობა და რა თქმა უნდა მთავრობის დედა! - მოდის ესე".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.