შინაგან საქმეთა სამინისტროს განცხადებით, საქართველოში ნარკოტიკების შემოტანისა და ფსიქოტროპული ნივთიერებების შეძენა-შენახვის ბრალდებით თბილისის აეროპორტში ერთი პირი დააკავეს.

უწყების განმარტებით, ბრალდებული თურქეთიდან ჩამოფრინდა და საქართველოში განსაკუთრებით დიდი ოდენობით ნარკოტიკული საშუალების, 265 აბი "სუბუტექსის" შემოტანას ცდილობდა.

გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის, განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანის და ფსიქოტროპული ნივთიერების უკანონო შეძენა-შენახვის ფაქტებზე, საქართველოს სისხლის სამართლის კოდექსის 260–ე მუხლის მე–6 ნაწილის "ა" ქვეპუნქტით, 261-ე მუხლის 1-ლი ნაწილით და 262-ე მუხლის მე-4 ნაწილის "ა" ქვეპუნქტით მიმდინარეობს. აღნიშნული ბრალი 20 წლამდე ვადით ან უვადო თავისუფლების აღკვეთას ითვალისწინებს.

გარდა ამისა, შინაგან საქმეთა სამინისტროში აცხადებენ, რომ ნარკორეალიზაციის კიდევ რამდენიმე ფაქტი აღკვეთეს. სამინისტროს ინფორმაციით, ქვეყანაში დიდი ოდენობით ნარკოტიკული საშუალების უკანონო შემოტანა, შეძენა-შენახვისა და გასაღების ბრალდებით რუსეთის მოქალაქე დააკავეს.

გამოძიების მტკიცებით, ბრალდებული ნარკოტიკულ ნივთიერებებს თბილისში, სხვადასხვა ადგილზე ათავსებდა, ფოტოებს უღებდა და შესაბამისი აღნიშვნებით და კოორდინატებით, შემდგომი გასაღების მიზნით ორგანიზატორს უგზავნიდა. უწყებაში ამბობენ, რომ დაკავებულის პირადი და სასტუმროს ნომრის ჩხრეკისას, ასევე, თბილისში 10 სხვადასხვა ლოკაციიდან, ნივთმტკიცებად ამოღებულია 15 შეკვრად დაფასოებული 122,96 გრამი ახალი ფსიქოაქტიური ნივთიერება.

გამოძიება საქართველოს სისხლის სამართლის კოდექსის 260-ე მუხლის მე-3 ნაწილის "ბ" ქვეპუნქტით, 19-260-ე მუხლის მე-5 ნაწილის "ბ" ქვეპუნქტით და 262 პირველი პრიმა მუხლებით მიმდინარეობს, რაც ნარკოტიკული საშუალების უკანონო შეძენა-შენახვას, წინასწარი შეთანხმებით ჯგუფის მიერ გასაღებას და ახალი ფსიქოაქტიური ნივთიერების საქართველოში უკანონოდ შემოტანას გულისხმობს. აღნიშნული მუხლები 5-დან 14 წლამდე ვადით თავისუფლების აღკვეთას ითვალისწინებს.

გარდა ამისა, ნარკოტიკების შეძენა-შენახვის ბრალდებით შსს-მ თბილისის შემოვლით გზაზე ერთი პირი დააკავა. უწყების მტკიცებით, ბრალდებულის ავტომანქანის ჩხრეკისას 392 აბი ნარკოტიკული საშუალება "სუბუტექსი" ნივთმტკიცებად ამოიღო.

გამოძიება საქართველოს სსკ-ის 260-ე მუხლის მე-6 ნაწილის "ა" ქვეპუნქტით მიმდინარეობს და 8-დან 20 წლამდე ვადით ან უვადო თავისუფლების აღკვეთას ითვალისწინებს.