მართლმადიდებელი ეკლესიის საპატრიარქოს პრესსპიკერი, მამა ანდრია ჯაღმაიძე მახათას მთაზე პრემიერ-მინისტრის, მამუკა ბახტაძის გამოსვლისას ტექნიკურ ხარვეზს გამოეხმაურა. როგორც ჯაღმაიძე ფეისბუქზე წერს, "ასეთი დაუდევრობით წყალში შეიძლება ჩავყაროთ მთელი შრომა".

დღეს, 12 მაისს მახათას მთის ღვთისმშობლის სახელობის ტაძარი გაიხსნა. ამავე დღეს, პირველად აღინიშნა ღვთისმშობლის წილხვდომილობის დღე.

"ამ დღესასწაულში ამინდიც გვწყალობდა, თუმცა ხომ არ შეიძლება ასეთ მნიშვნელოვან დღეს მაინც, გამონაკლისის სახით ყველაფერი ბოლომდე იდეალურად, რომ გავმართოთ? წირვის შემდეგ ალბათ ერთ-ერთი მნიშვნელოვანი საკითხი, კარგად გამართული გახმოვანება უნდა ყოფილიყო, გახმოვანების ტექნიკური ხარვეზის გამო კი პრემიერის მისალოცი სიტყვა ეთერში არაბუნებრივად უცნაური ტონალობით გაისმა, გეგონებოდა ქეიფს კარგად შეყოლილი თამადა ბოლო სადღეგრძელოს ამბობდა", — წერს მამა ანდრია ჯაღმაიძე.

მახათას მთაზე სიტყვით გამოსვლისას მამუკა ბახტაძის საუბარი შენელებული იყო და წყდებოდა. აღნიშნული ტექნიკური ხარვეზი საკუთარ თავზე აიღო საზოგადოებრივმა მაუწყებელმა და ბოდიში მოიხადა. გარდა ამისა, ამ საკითხზე საგანგებო ბრიფინგი გამართა მამუკა ბახტაძემ და ფაქტს სამწუხარო უწოდა.