პრემიერ-მინისტრმა მამუკა ბახტაძემ მახათას მთაზე გამოსვლისას ტექნიკური ხარვეზის გამო საგანგებო ბრიფინგი გამართა.

"სამწუხაროდ, მახათას მთაზე ვიდეო და აუდი გადაცემისას შეიქმნა ტექნიკური პრობლემა. მე მქონდა, მაქვს გულითადი სურვილი გადავცე ჩემი ემოცია და დამოკიდბეულება ჩვენს საზოგადოებას", — განაცხადა მამუკა ბახტაძემ. კითხვაზე ხომ არ იყო ეს მიზანმიმართული ტექნიკური ხარვეზი, პრემიერმა უპასუხა, რომ გაარკვევენ.

პრემიერ-მინისტრის, მამუკა ბახტაძის გამოსვლისას ტექნიკური ხარვეზის გამო საზოგადოებრივმა მაუწყებელმა ბოდიში უკვე მოიხადა. განცხადება პირველი არხის ვებგვერდზე გავრცელდა:

"12 მაისს, მახათას მთაზე ივერიის ყოვლადწმინდა ღვთისმშობლის ხატის სახელობის ტაძრის გახსნისას, პრემიერ-მინისტრ მამუკა ბახტაძის სიტყვით გამოსვლის დროს, ხალხმრავლობის გამო, ფიზიკური კონტაქტის შედეგად დაზიანდა აუდიო-ვიდეო კაბელი, რის გამოც ტრანსლაციის დროს მოხდა ტექნიკური ხარვეზი. ტექნიკური წუნის გამო საქართველოს პირველი არხი მაყურებელს ბოდიშს უხდის".