ფინანსთა სამინისტროს საგამოძიებო სამსახურის განცხადებით, სამართალდამცავებმა ქვეყნის მასშტაბით აზარტული თამაშებისთვის განკუთვნილი, დიდი ოდენობით სათამაშო აპარატების უკანონოდ განთავსებისა და ფუნქციონირების ფაქტი გამოავლინეს.

უწყების ცნობით, თბილისში, გარდაბანში, რუსთავში, მარნეულში, ფოთსა და სენაკში - ბაზრობებსა და ხალხმრავალ ადგილებზე, სხვადასხვა პირებს განთავსებული ჰქონდათ სათამაშო აპარატები, რომელთა მეშვეობით მართავდნენ აზარტულ თამაშებს ლიცენზიებისა და ნებართვების შესახებ საქართველოს კანონით გათვალისწინებული ნებართვის გარეშე და იღებდნენ დიდი ოდენობით უკანონო შემოსავალს. საგამოძიებო სამსახურმა ჯამში 100-მდე სათამაშო აპარატი ამოიღო.

"სათამაშო აპარატები წარმოადგენს ელექტრო-მექანიკურ მოწყობილობაზე მომუშავე ე.წ. სლოტ აპარატებს და კუსტარულად დამზადებულ მოწყობილობას, რომელიც ქაღალდის კუპიურებისა და 20 თეთრიანი მონეტების გამოყენებით, შემთხვევითობის პრინციპით, მოთამაშეს აძლევს მიზერულ მოგებას".

საქმეზე მიმდინარეობს გამოძიება საქართველოს 192-ე მუხლის პირველი ნაწილით და 194-ე მუხლის მე-3 ნაწილის გ ქვეპუნქტით, რაც ითვალისწინებს თავისუფლების აღკვეთას ვადით 7-დან 10 წლამდე.