მალხაზ მაჩალიკაშვილი ამბობს, რომ მასსა და ზაზა სარალიძეს შორის არანაირი განხეთქილება არ ყოფილა. ამის შესახებ მან 9 მაისს, პალიტრანიუსის გადაცემა 360 გრადუსში საუბრისას განაცხადა:

"ერთი საწყენი სიტყვა არ გვითქვამს, უბრალოდ მაგ კაცს დაღლა შევამჩნია და მეორე — მისი შვილი სახელმწიფომ არ მოკლა, ჩემი მოკლა". მაჩალიკაშვილის თქმით, ზაზა სარალიძე ორ თვეზე მეტია აღარ არის პარლამენტის წინ მასთან ერთად, თუმცა მიზეზსს ვერ გაამხელს რადგან ეს "ზაზას პირადი საქმეა".

"ერთი რამ შემიძლია გითხრათ, მე ჩამოვედი ზაზას გვერდში დასადგომად, იმ კაცში ვიგრძენი ის სიმწარე რასაც ვგრძნობში ჩემში და იმ ადამიანის გვერდში ვიქნები, ამას წლები რომ დასჭირდეს... ის არავის არ უკავშირდება, რამდენადაც მე ვფიქრობ, ის ადამიანი არის თავისთვის ჩაკეტილი, რაც ჩემთვისაც ძნელია, მისი ამ მდგომარეობაში ყოფნა", — ამბობს მაჩალიკაშვილი.

ხორავას ქუჩაზე მოკლული მოზარდის მამა, ზაზა სარალიძე თითქმის ერთი წელი პანკისის სპეცოპერაციის შედეგად გარდაცვლილ თემირლან მაჩალიკაშვილის მამასთან, მალხაზ მაჩალიკაშვილთან ერთად იბრძოდა. მათ ბოლო რამდენიმე თვე თბილისში, რუსთაველის გამზირზე პარლამენტის წინ კარავში გაატარეს. სარალიძე მალხაზ მაჩალიკაშვილთან ერთად მათი შვილების მკვლელების დასჯას ითხოვდა. #მამებისიმართლისთვის — ასე ჰქვია აქციას, რომელიც მამების შიმშილობით დაიწყო.

გაიგეთ მეტი: