ეკონომიკის ყოფილმა მინისტრმა, გიორგი ქობულიამ ფორბსის კვირასთან საუბრისას განაცხადა, რომ მას გაუკვირდა, როცა მისი შვებულების შესახებ კრიტიკის დროს გუნდიდან არავინ დაიცვა. მისი თქმით, ის მაშინ ვერ ხვდებოდა "რაში იყო საქმე".

ქობულიას მონაყოლიდან ირკვევა, რომ მისი და მთავრობის მეთაურისა (მამუკა ბახტაძის) თუ მმართველი პარტიის ლიდერის (ბიძინა ივანიშვილის) შეთანხმება იყო, რომ სექტემბრიდან უნდა დაეწყო მუშაობა.

"მე ვთანხმდებოდი ამ პოზიციას მხოლოდ იმ შემთხვევვაში, თუ მე მექნებოდა საშუალება, რომ საქმეები გადამებარებინა, როგორც ვილაპარაკე ადრეც ჯანმრთელობისთვის მიმეხედა... მე, რა თქმა უნდა, პერიოდში ივლისი-აგვისტო რამდენიმეჯერ ჩამოვედი საქართველოში ვიმუშავე. მაგრამ, სრულფასოვნად შევუდექი მხოლოდ სექტემბრიდან", — განმარტა მან.

მანამდე, 4 მაისს შაბათის კურიერში გავიდა ქობულიას კომენტარი, სადაც ის ამბობდა, რომ თანამდებობა თავისი ნებით არ დაუტოვებია. ქობულია თანამდებობიდან ორი კვირის წინ გადააყენეს.