ქართული ოცნების დეპუტატი რატი იონათამაშვილი აცხადებს, რომ საგზაო უსაფრთხოების მიმართულებით პოლიტიკის გამკარცებას მიესალმება. ამის პარალელურად, შეზღუდული შესაძლებლობების მქონე პირების სახელით სოციალური კამპანიის ერთ-ერთ რეკლამას აკრიტიკებს.

იონათამაშვილის თქმით, ამ რეკლამაში ეტლი წარმოჩენილია, როგორც ავარიის უარყოფითი შედეგი, რაც, ეტლითმოსარგებლეებისთვის დისკომფორტის შემქმნელია.

"ჩემი გამოცდილებით ვიცი ძალიან კარგად, როგორ შეიძლება ერთმა გაუთვალისწინებელმა წამმა, უცოდინრობით დაშვებულმა შეცდომამ თავდაყირა დააყენოს ადამიანის სიცოცხლე, ამიტომ აგრესიული პიარი მისასალმებელია. ეს დაგვაფიქრებს და შედეგებსაც ვნახავთ. ერთ საკითხზე ვიტყვი უბრალოდ, რამაც ეტლითმოსარგებლე ადამიანებში გარკვეული უხერხულობა შექმნა. ეს არის რგოლი, სადაც ეტლი, როგორც ნეგატიური რეკვიზიტი იყო წარმოდგენილი, რადგან ჩემს და სხვა ეტლითმოსარგებლეების შემთხვევაში ეტლი ავარიის შედეგი კი არაა, არამედ ამ შედეგზე გამარჯვების სიმბოლოა", — განაცხადა რატი იონათამაშვილმა.

შინაგან საქმეთა სმაინისტრომ დაიწყო სოციალური კამპანია "მეტი სიცოცხლისთვის", რომელიც საზოგადოების ცნობიერების ამაღლებას ემსახურება. კამპანიის ფარგლებში, თბილისსა და რეგიონებში, დამტვრეული ავტომობილების დროებითი ინსტალაციები დამონტაჟდა, გამოჩნდა ბანერები და დამზადდა შესაბამისი ვიდეორგოლები. ასევე, შეიქმნა ვებგვერდი formore.life და ფეისბუქ-გვერდი, სადაც კამპანიის ფარგლებში დაგეგმილი ყველა სიახლე განთავსდება.