შინაგან საქმეთა მინისტრის, გიორგი გახარიას თქმით, წლის ბოლოს სამინისტროს ოთხი ვერტმფრენი ეყოლება. მისივე თქმით, ამ ეტაპზე სასაზღვრო პოლიციის ინფრასტრუქტურაში მხოლოდ ერთი ვერტმფრენია.

"წლის ბოლომდე შსს-ეს ეყოლება გამართული, რა თქმა უნდა, არა ახალი, მაგრამ კაპიტალურად გამართული ოთხი ვერტმფრენი", — აღნიშნა მინისტრმა.

შინაგან საქმეთა მინისტრს, გიორგი გახარიას მინისტრის საათის ფარგლებში პარლამენტში უსმენენ. გახარია სხვა საკითხებთან ერთად, პანკისის ხეობაში განვითარებულ მოვლენებთან დაკავშირებით ისაუბრებს.

პარალელურად, მას ფრაქცია ევროპული საქართველოც იბარებდა. პასუხად, გიორგი გახარიამ თქვა, რომ პარლამენტში მისვლას ისედაც გეგმავდა და ევროპულ საქართველოსთან ყავაზე მივიდოდა. მოგვიანებით, დეპუტატმა ელენე ხოშტარიამ მიიღო გახარიას "შეთავაზება" და განაცხადა, რომ "ყავას საკუთარი ხელით მოუდუღებს, თუ ის ყველა კითხვას უპასუხებს".