დიდი ბრიტანეთის პარლამენტის, თემთა პალატის დეპუტატს, ფიონა ონასანიას მანდატი ამომრჩეველთა პეტიციის საფუძველზე ჩამოართვეს. იანვარში ყოფილ დეპუტატს მანქანით სიჩქარის გადამეტების საქმეზე მიცემული ცრუ ჩვენებისთვის სამთვიანი პატიმრობა მიუსაჯეს.

ონასანია თემთა პალატაში პიტერბოროს ოლქს წარმოადგენდა. ცრუ ჩვენების საქმის შემდეგ ის ლეიბორისტული პარტიიდანაც გარიცხეს, რის შემდეგაც დამოუკიდებელი დეპუტატი გახდა.

ფიონა ონასანია თემთა პალატის პირველი დეპუტატი გახდა, რომელმაც გაწვევის პროცედურების შესაბამისად მანდატი დაკარგა. გაწვევის პროცედურები 2015 წელს მაშინდელი პრემიერ-მინისტრის, დევიდ კემერონის ინიციატივის საფუძველზე მიიღეს. კანონის მიხედვით, მანდატის შეჩერებისთვის ოლქის ამომრჩეველთა 10 პროცენტის ხელმოწერა იყო საჭირო. პიტერბოროს ადმინისტრაცია აცხადებს, რომ პეტიციას ხელი 19 ათასზე მეტმა ადამიანმა მოაწერა ხელი.

ყოფილი დეპუტატი თემთა პალატაში 2017 წლის ივნისში აირჩიეს. ერთი თვის შემდეგ, როდესაც დააფიქსირეს, რომ მისი მანქანა მაღალი სიჩქარით მოძრაობდა, ონასანია ბრალდებებს უარყოფდა და ამბობდა, რომ საჭესთან სხვა ადამიანი იჯდა.