თბილისი პრაიდის ორგანიზატორის, გიორგი თაბაგარის თქმით, 17 მაისს, "ოჯახის სიწმინდის დღისადმი" მიძღვილ ღონისძიებაზე სიმღერა უმცირესობების დამცირებასა და არაღიარებას ნიშნავს. ამის შესახებ ის Facebook-ის პირად გვერდზე წერს.

"ეს ვითომ დღესასწაული, რომელსაც საფუძვლად ადამიანების ჩაგვრა და მათი განადგურების სურვილი უდევს, ვერანაირად ვერ იქნება არაძალადობრივი. შესაბამისად, მასში მონაწილეობა არ მართლდება. არც პატრიარქის ზარით და არც იესოს ხელახალი აღდგომით", — აღნიშნავს თაბაგარი.

17 მაისი ჰომოფობიასთან და ტრანსფობიასთან ბრძოლის საერთაშორისო დღეა. 2013 წლის 17 მაისს ძალადობრივმა ჯგუფებმა, მათ შორის ანაფორით შემოსილმა პირებმა მშვიდობიანი აქცია დაარბიეს. ამის შემდეგ საქართველოს მართლმადიდებელი ეკლესიის პატრიარქმა, ილია მეორემ 2014 წელს ეს დღე "ოჯახის სიწმინდის დღედ" გამოაცხადა.

წელს ამ დღის აღსანიშნავად საპატრიარქო სხვასხვა აქტივობას გეგმავს. ბროშურაზე "ჩვენი ოჯახი ჩვენი ღირსებაა" ვკითხულობთ, რომ 17 მაისს დაგეგმილ გალა კონცერტზე იმღერებენ ნინო ქათამაძე, თამრიკო ჭოხონელიძე, ნატო მეტონიძე, აჩიკო ნიჟარაძე და სხვა შემსრულებლები. ასევე, იცეკვებს ნაციონალური ბალეტი სუხიშვილები. სუხიშვილების ცხელ ხაზზე კონცერტში მონაწილეობა დაადასტურეს, ნინო ქათამაძის პროდიუსერმა კი თქვა, რომ მომღერალი კონცერტში მონაწილეობას არ მიიღებს.