ტრეფიკინგში ბრალდებული იულია სუსლიაკი ითხოვს, რომ მისი შვილები "ჟურნალისტების ჩარევისგან დაიცვან". ბრალდებულის კომენტარი საზოგადოებრივმა მაუწყებელმა გაავრცელა. სხდომა მხარეთა შუამდგომლობის საფუძველზე დაიხურა.

"მე თავიდანვე მქონდა მოთხოვნა, რომ ეს არ ყოფილიყო საჯარო, დაეცვათ ჩემი შვილები ჟურნალისტების ჩარევისგან. ყველა ნებისმიერი სხვა ადამიანისგან, გარდა იმ ხალხისა რომლებიც დღეისთვის პასუხისმგებლები არიან ჩემი შვილების უსაფრთხოებასა და ჯანმრთელობაზე. ნებისმიერი ჩარევა ჟურნალისტებისა თუ სხვა ორგანოების უნდა იყოს ჩემთან შეთანხმებული ჩემი ადვოკატის მეშვეობით", — განაცხადა იულია სუსლიაკმა.

აღმკვეთი ღონისძიების სხდომის დახურვა საქმეში არსებული პერსონალური ინფორმაციის გამო პროკურორმა მოითხოვა და ადვოკატიც დაეთანხმა.

ბრალდების მხარე ითხოვს, რომ აღმკვეთი ღონისძიების სახით იულია სუსლიაკის პატიმრობა შეეფაროს, დაცვის მხარე კი მის გათავისუფლებას ითხოვს. ადვოკატის ცნობით, საქმეში ტრეფიკინგის მტკიცებულებები არ არის.

იულია სუსლიაკი, რომელიიც ამტკიცებს, რომ საქართველოში ჩამოყვანილი ათივე ბავშვი მისი შვილია დღეს, 26 აპრილს დააკავეს. შსს-ს მის საქმეზე გამოძიება ტრეფიკინგის მუხლით აქვს დაწყებული. ამ ეტაპისთვის ათივე ბავშვი სახელმწიფო ზრუნვაშია გადაყვანილი.

უწყების განმარტებით, სუსლიაკი ბავშვებთან ერთად თბილისში მოსკოვიდან 8 აპრილს ჩამოვიდა და აფხაზეთში ქმართან გადასვლას აპირებდა. სამინისტროში განაცხადეს, რომ 10 მცირეწლოვანი ბავშვიდან 4 დაბადებულია 2017 წელს, ხოლო სამი 2018-ში, რამაც გააჩინა ეჭვი, რომ აღნიშნული შეიცავდა ტრეფიკინგის ნიშნებს. მისი საქმით კი გამოძიება მას მერე დაინტერესდა, რაც ბავშვები ინტოქსიკაციით ზუგდიდის საავადმყოფოში გადაიყვანეს. თვითონ ქალი ამბობს, რომ ოთხი შვილი მან გააჩინა, ხოლო ექვსი — სუროგატმა.

დღესვე გახდა ცნობილი, რომ სუსლიაკმა უკრაინიდან რუსეთში 11 ბავშვი გადაიყვანა, ხოლო საქართველოში 10 ბავშვი შემოიყვანა. შსს დაკარგულ ბავშვს ინტერპოლით ეძებს. გარდა ამისა, ერთ-ერთი ბავშვი პირად საუბარში ყვება, რომ იულია სუსლიაკი დედამისი არაა და სიკვდილის შიში აქვს, ხოლო ერთი ბავშვი აშშ-ს მოქალაქეა.

გაიგე მეტი: რა ვიცით ამ დროისთვის, სავარაუდოდ, ბავშვებით ვაჭრობის საქმეზე