მსახიობი ლევან ჯიბღაშვილი აცხადებს, რომ ნარკომომხმარებელი არ არის და ამასთან, გამორიცხავს იმასაც, რომ პოლიციის მიერ მის ჩანთაში აღმოჩინელი ნივთიერებების რეალიზაციას გეგმავდა. ამის შესახებ მან დღეს, 25 აპრილს TV პირველის ეთერში ინგა გრიგოლიასთან ინტერვიუში განაცხადა:

"მომხმარებელი არ ვარ... ვაღიარებ დანაშაულს. [რეალიზაცია] ყველანაირად გამორიცხა გამოძიებამ. როდესაც რეალიზაციაზე მიდის საქმე, იქ ცოტა სხვა მიმართულებებია. ჩემს შემთხვევაში, არცერთი ეჭვი არ ყოფილა ამაზე, აქ ბრალი იყო პირდაპირ შეძენა-შენახვაზე".

ლევან ჯიბღაშვილის ნარკოდანაშაულის ბრალდებით დაკავების შესახებ ინფორმაცია 22 აპრილს გავრცელდა. მას ბრალი სისხლის სამართლის კოდექსის 260-ე მუხლის პირველი ნაწილით წარედგინა, რაც ნარკოტიკული საშუალების უკანონო შეძენა-შენახვას გულისხმობს. ჯიბღაშვილს აღკვეთის ღონისძიების სახით 10 000-ლარიანი გირაო შეეფარდა. გირაოს შუამდგომლობა პროკურატურამ დააყენა.

მსახიობის ადვოკატის განცხადებით, ჩანთა, რომელშიც ნარკოტიკული საშუალება იპოვეს, ბრალდებულს ეკუთვნოდა. მისივე თქმით, ჯიბღაშვილი ბრალს აღიარებს და გამოძიებასთან თანამშრომლობს.

ორი დღის განმავლობაში არც პროკურატურა, არც შინაგან საქმეთა სამინისტრო და არც ბრალდებულის ადვოკატი არ ამხელდნენ მანქანიდან ამოღებული ნარკოტიკული საშუალების ოდენობასა და სახეობას. 24 აპრილს შსს-მ განაცხადა, რომ ჯიბღაშვილის მანქანიდან 0,5659 გრამი კოკაინი და 0,1921 გრამი ექსტაზი (MDMA) ამოიღეს.