პატრია ევროპული საქართველო იუსტიციის უმაღლესი საბჭოდან პარლამენტის მიერ დანიშნული სამი არამოსამართლე წევრის გაწვევას ითხოვს. ესენი არიან, ლევან გზირიშვილი, ზაზა ხარებავა და შოთა ქადაგიძე. პატრიის მოთხოვნა პარლამენტში უკვე დარეგისტრირდა.

ევროპული საქართველოს პოზიციით, ამ პირებმა მხარი დაუჭირეს უზენაესის მოსამართლეთა კანდიდატობის 10-კაციან სიას. პარლამენტის მიერ საბჭოში დანიშნულ კიდევ ორ არამოსამართლე წევრთან, ნაზი ჯანეზაშვილთან და ირმა გელაშვილთან საპარლამენტო უმცირესობას პრეტენზია არ აქვს, რადგან უზენაესი სასამართლოს მოსამართლეობის კანდიდატთა 10-კაციანი სიისთვის მათ მხარი არ დაუჭერიათ.

საბჭოს იმ წევრებმა, რომელთა გაწვევასაც ევროპული საქართველო ითხოვს, განცხადება გაავრცელეს. ისინი ხსნიან, რატომ დაუჭირეს მხარი პარლამენტისთვის წარსადგენ 10-კაციან სიას.

"უპირველეს ყოვლისა, უნდა აღინიშნოს, რომ ჩვენი გადაწყვეტილება განპირობებული იყო ჩვენი შინაგანი რწმენით, რაც დაეფუძნა მხარდაჭერილ კანდიდატთა კეთილსინდისიერებასა და კომპეტენციას. ამასთან, ჩვენი ოპონენტები ვერ უთითებენ საქართველოს მოქმედი კანონმდებლობის ვერც ერთ ნორმას, რომლის დარღვევის გამოც ნომინირების პროცესი უკანონოდ შეიძლებოდა მიჩნეულიყო", — ნათქვამია განცხადებაში.

იუსტიციის საბჭოს წევრების თქმით, იუსტიციის საბჭოს წევრების გაწვევის ინიციატივები საფრთხის შემცველია შემდეგი თვალსაზრისითაც:

"თუ დავუშვებთ, რომ პარლამენტი უფლებამოსილია გარკვეული პოლიტიკური მიზნებისათვის გადააყენოს საქართველოს იუსტიციის უმაღლესი საბჭოს მის მიერ არჩეული წევრი, გამოვა, რომ პოლიტიკური ჩარევისაგან დაცული არ იქნება პარლამენტის მიერ განწესებული არც ერთი სხვა თანამდებობის პირიც (მაგ: სახალხო დამცველი, გენერალური აუდიტორი, ეროვნული მარეგულირებელი ორგანოს წევრი და სხვა), რაც ძირს გამოუთხრის სამართლებრივი სახელმწიფოს არსებობას", — ვკითხულობთ განცხადებაში.

გზირიშვილის, ხარებავა და ქადაგიძე ფიქრობენ, რომ ევროპული საქართველოს ინიციატივა აბსოლუტურად უსაფუძვლო და უპერსპექტივოა.

"ამ ინიციატივას უკვე მოჰყვა რიგი პოლიტიკოსებისგან ჩვენი მიმართ სრულიად არაეთიკური შეფასებები (მაგ: ,"მდუმარე წევრები", ,"მუქთახორები", ,"კლანის მონები" და სხვა), რაც დაუშვებელია", — აცხადებენ იუსტიციის საბჭოს წევრები.

ისინი მოუწოდებენ ყველა სუბიექტს შეწყვიტონ მსგავსი ქმედებები, რადგან "ისინი უგულებელყოფენ ხელისუფლების დანაწილების ფუნდამენტურ პრინციპს და აზიანებენ დემოკრატიულ გარემოს საქართველოში".