თბილისის საქალაქო სასამართლომ სექსუალური ორიენტაციის ნიადაგზე დისკრიმინაციის გამო ორი მაღაზია 100-100 ლარით დააჯარიმა. ამის შესახებ თანასწორობის მოძრაობის იურისტმა, თამარ მჭედლიშვილმა On.ge-ს განუცხადა.

მისი ინფორმაციით, 2017 წლის 14 თებერვალს ვალენტინობის დღესთან დაკავშირებით მაღაზიებმა აქცია გამოაცხადებს, რომლის ფარგლებშიც დაინტერესებულ პირს შეეძლო, ნივთზე შეთავაზებული ფასდაკლებებით ესარგებლა. მისივე ცნობით, აქციის ფარგლებში მაღაზიების მომხმარებლები მხოლოდ ქალის ან კაცის პროდუქციის შეძენის შემთხვევაში ისარგებლებდნენ შესაბამისი ფასდაკლებით.

"თორნიკე კუსიანი დაუკავშირდა აღნიშნულ მაღაზიებს და საკუთარი კაცი პარტნიორისთვის საჩუქრის შეძენა დააპირა. სატელეფონო საუბრისას მოპასუხეებმა განუცხადეს, რომ მხოლოდ ქალისა და მამაკაცის ნივთების შეძენის შემთხვევაში იქნებოდა შესაძლებელი აქციებით სარგებლობა და აქცია ვრცელდებოდა მხოლოდ ჰეტეროსექსუალ წყვილებზე", — აცხადებენ თანასწორობის მოძრაობაში.

ორგანიზაციაში მიიჩნევენ, რომ მოპასუხემ არ გაითვალისწინა განსხვავებული სექსუალური ორიენტაციის მქონე პირების მოთხოვნილებები და ამ აქციით ის ჰეტეროსექსუალ წყვილებთან შედარებით დისკრიმინაციულ გარემოში მოაქცია.