გასულ კვირას, HBO-მ მაყურებელს დიდებული სიურპრიზი გაუკეთე. გარდა იმისა, რომ მთელი მსოფლიო GOT-ის ფინალური სეზონის პრემიერას ელოდებოდა, არხმა მონტერეელი დიასახლისების - სელესტის, მედელინის, ჯეინის, რენატასა და ბონის ისტორიის გაგრძელება დააანონსა და Big Little Lies-ის პირველი პრომოთი გვაუწყა, რომ შესანიშნავი ხუთეული ეკრანს 9 ივნისიდან დაუბრუნდებიან.

მაყურებელმაც ტიზერის გამოსვლის დღიდან, დროის ათვლა დაიწყო და უკვე ერთი სული აქვთ ნახონ როგორ გრძელდება 2017 წელს, ემისა და ოქროს გლობუსის გამარჯვებული საუკეთესო მინისერიალი ნიკოლ კიდმანის, რიზ უიზერსპუნის, ლორა დერნის, შეილინ ვუდლის, ზოე კრავიცისა და ამიერიდან უკვე ცოცხალი ლეგენდის, მერილ სტრიპის მონაწილეობით.

ცოტა ხნის წინ HBO-მ სერიალის კიდევ ერთი ტიზერი გაავრცელა, სადაც ამჯერად მერილ სტრიპის პერსონაჟზე, მერი ლუისზე უფრო მეტი აქცენტია და ვრწმუნდებით, რომ ის შესაძლოა სულაც არ იყოს თბილი და მოსიყვარულე ბებია.

როგორც ხედავთ, წინ დიდებული მსახიობების მონაწილეობით, დიდებული სერიალის მეორე სეზონი გველოდება და ჩვენც ისღა დაგვრჩენია, ამ სანახაობას დაველოდოთ.