ჟურნალისტური ეთიკის ქარტიის დირექტორის, ნატა ძველიშვილის თქმით, აჭარის საზოგადოებრივ მაუწყებელში დირექტორის პოსტიდან ნათია კაპანაძის იმპიჩმენტი სარედაქციო პოლიტიკაზე აისახება.

როგორც ძველიშვილმა On.ge-ს განუცხადა, კაპანაძის გადაყენებაზე მრჩეველთა საბჭოსგან მყარი დასაბუთება ვერ მოისმინეს და ბოლო ერთ კვირაში განვითარებული მოვლენები ბევრ ეჭვს აღძრავს. მისივე თქმით, მრჩეველთა საბჭოს ორი წევრის წერილში აღნიშნული საკითხები შიდა სამუშაო პროცესში უნდა განხილულიყო.

"ორი საკითხი იყო, ინტერესთან კონფლიქტი და ფინანსური საკითხები, რაზეც შეიძლება, იმსჯელოს მრჩეველთა საბჭომ დირექტორის უნდობლობაზე, აქაც ყველაფერი დარჩა სპეკულაციად", — განაცხადა ეთიკის ქარტიის ხელმძღვანელმა.

მისივე თქმით, პასუხი ვერ მიიღეს იმაზე, თუ ვინ რა მონაცემებს ეყრდნობა და რეალურად სად არის პრობლემა, რადგან აუდიტის დასკვნები სხვაზე მეტყველებს:

"მრჩეველთა საბჭომ დღეს თქვა, რომ ის პროგრესი, რომელიც ჰქონდა აჭარის მაუწყებელს აღარ უნდ გაგრძელდეს. ეს არის მთავარი დასკვნა, რომელიც ამ სხდომიდან შეიძლება, გამოვიტანოთ. უახლოეს მომავალში ჩვენ ვნახავთ საითკენ წავა ეს მაუწყებელი".

დღეს, 19 აპრილს აჭარის ტელევიზიის გენერალურ დირექტორს, ნათია კაპანაძეს მრჩეველთა საბჭომ იმპიჩმენტი გამოუცხადა. მომხრე ოთხი მრჩეველი იყო, წინააღმდეგი — ერთი. კაპანაძე გადაწყვეტილებას სასამართლოში გაასაჩივრებს.