საქართველოს პრეზიდენტი, გიორგი მარგველაშვილი უმრავლესობის იმ წარმომადგენლებთან, რომლებიც მიიჩნევენ, რომ პრეზიდენტმა უზენაესი სასამართლოს კანდიდატები ერთპიროვნულად შეარჩია, კონსულტაციებს არ გამართავს. ინფორმაციას ამის შესახებ მარგველაშვილის მრჩეველი ადამიანის უფლებებისა და მართლმსაჯულების საკითხებში, კახა კოჟორიძე ავრცელებს.

მისი თქმით, პრეზიდენტს ამ თემასთან დაკავშირებით პრინციპული პოზიცია აქვს:

"საქართველოს პრეზიდენტის პრინციპული პოზიციაა, რომ პოლიტიკური კონსულტაციები და კულუარული შეთანხმებები უზენაესი სასამართლოს კანდიდატებთან დაკავშირებით არ გაიმართება".

კოჟორიძის თქმით, უზენაესი სასამართლო პოლიტიკაში არ უნდა ჩაერთოს. ამიტომ, პრეზიდენტის მიერ დასახელებულ უზენაესი სასამართლოს კანდიდატებზე შეთანხმება არ უნდა იყოს პოლიტიკური პროცესის, თუ კულუარული, პოლიტიკური შეთანხმებებისა და კონსულტაციების საგანი:

"ჩემთვის მართლაც გაუგებარია, უმრავლესობის წარმომადგენლების მოთხოვნა კანდიდატურებზე კონსულტაციების გამართვასთან დაკავშირებით. კანდიდატები პრეზიდენტის მიერ უკვე დასახელებულია და ამ კანდიდატებთან დაკავშირებით პარლამენტში, საკომიტეტო განხილვები უკვე დასრულებულია".

დღეს, 4 მაისს, უმრავლესობის ლიდერმა გია ვოლსკიმ რუსთავი 2-ს ჟურნალისტთან საუბრისას თქვა, რომ უზენაესი სასამართლოს კანდიდატებთან დაკავშირებით პრეზიდენტმა უმრავლესობის ლიდერებთან კონსულტაციები უნდა გამართოს:

"ვფიქრობ, საზოგადოების დიდი ნაწილის პოზიციას გამოვხატავ ამ თემასთან [უზენაესი სასამართლოს კანდიდატების შერჩევა] დაკავშირებით. ეს თემა შეიძლება კონსტიტუციით, ან რომელიმე კანონით არაა განსაზღვრული, მაგრამ ქვეყანას ეს სჭირდება".

გია ვოლსკის თქმით, მისი პარტია ჩამოყალიბებული არაა კანდიდატურებთან დაკავშირებით ვის მისცემენ ხმას.

უზენაესი სასამართლოს კანდიდატები არიან ანა დოლიძე, თამარ ლალიაშვილი და ნონა თოდუა.