დღეს კანის 72-ე კინოფესტივალის საკონკურსო პროგრამა გამოქვეყნდა. ოქროს პალმის რტოს მოსაპოვებლად ერთმანეთს ცხრამეტი ფილმი შეეცილება. მათ შორის არის პედრო ალმოდოვარის, კენ ლოუჩის, ჟან პიერ და ლუკ დარდენების, ქსავიე დოლანის, ტერენს მალიკისა და ჯიმ ჯარმუშის ფილმები.

საკონკურსო პროგრამის მიღმა კი 2019 წლის რამდენიმე მნიშვნელოვან სურათს აჩვენებენ, მათ შორის დექსსტერ ფლეტჩერის Rocketman, კლოდ ლელუშის The Best Years of Life-ს (მთავარ როლებში ანუკ ემე და ჟან-ლუი ტრენტინიანი), ასიფ კაპადიას დოკუმენტურ ფილმს დიეგო მარადონაზე, ნიკოლას ბედოსის Belle Epoque-ს (მთავარ როლებში გიომ კანე და ფანი არდანი) და ასევე ნიკოლას ვინდინგ რეფნის სერიალს Too Old to Die Young.

მიუხედავად დიდი მოლოდინისა, ვერც საკონკურსო პროგრამაში და ვერც მის მიღმა ვერ მოხვდა კვენტინ ტარანტინოს ახალი ფილმი ერთხელ ჰოლივუდში.

მოლოდინები მას შემდეგ კიდევ უფრო გამძაფრდა, რაც The Hollywood Reporter-ს წყარომ უთხრა, რომ ფესტივალის ორგანიზატორებმა რეჟისორთან შეთანხმებას უკვე მიაღწიეს და კროიზეტის ბულვარში დაგებულ წითელ ხალიჩაზეც სულმოუთმენლად ელიან.

სამწუხაროდ მოლოდინი არ გამართლდა და ტარანტინო კანს მიღმა დარჩა. როგორც ჩანს, ფილმს მართლაც ელოდნენ ფესტივალის ორგანიზატორები და როგორც პრესკონფერენციაზე აღნიშნეს, ერთადერთი მიზეზი, რის გამოც ფილმი პროგრამაში ვერ მოხვდა არის ის, რომ რეჟისორმა სურათზე მუშაობა ვერ დაასრულა და არ იცის მოასწრებს თუ არა მაისამდე.

მიუხედავად ამისა, ფესტივალის დირექტორმა, ტიერი ფრემომ იმედი გამოთქვა, რომ ტარანტინო თავისი ახალი ფილმის მონტაჟს დაასრულებს და მისი პრემიერაც აუცილებლად კანში შედგება.

"ამ ეტაპზე ფილმი სამონტაჟოშია. იმედი მაქვს ტარანტინო ამ ფილმს დაასრულებს და მას კანში ვიხილავთ, რადგან ის ნაწილი, რაც ვნახე ფანტასტიკურია", - თქვა ტიერი ფრემომ.

კანის კინოფესტივალი 14 მაისს დაიწყება. წლევანდელ პოსტერზე ლეგენდარული რეჟისორი, ანიეს ვარდაა გამოსახული, რომელიც 29 მარტს 90 წლის ასაკში გარდაიცვალა.

კანის კინოფესტივალის ჟიურის წელს მექსიკელი რეჟისორი, ალეხანდრო გონსალეს ინიარიტუ უხელმძღვანელებს.

რაც შეეხება სექცია განსაკუთრებულ ხედვას, აქ ჟიურის თავმჯდომარე ლიბანელი რეჟისორი, გასული წლის ერთ-ერთი ყველაზე მნისვნელოვანი კინომოვლენის Capernaum რეჟისორი, ნადინ ლაბაკია.

ამავე თემაზე:

კანი 2019 — უკვე ცნობილია, ვინ იბრძოლებს ფესტივალის მთავარი პრიზისთვის

ვარსკვლავები, რომლებიც წელს კანის კინოფესტივალს დაესწრებიან