თბილისის მერის განცხადებით, ჩატარდება კვლევა, რომლითაც დაიგეგმება, თუ რისი გაკეთება შეიძლება იმ რაიონებში, სადაც ტრანსპორტის ნაკლებობაა. ამის შესახებ კახა კალაძემ დღეს, 17 აპრილის მთავრობის სხდომაზე ისაუბრა.

"შეიძლება ეს იყოს ტრამვაი, ან მეტრო", — თქვა კალაძემ და მაგალითისთვის მოიყვანა დიდი დიღომი:

"დიღმის მიმართულებით არის სერიოზული მოსაზრება იმისა, რომ შესაძლებელია მიწისზედა მეტროს პროექტის განხორციელება... დიღომი ერთ-ერთი საუკეთესოა და მარტივად შესაძლებელია პროექტის განხორციელება".

თბილისის მერის განცხადებით, კვლევა აჩვენებს, თუ როგორ შეიძლება ამ [დიდი დიღმის] მიმართულებით განვითარდეს ტრანსპორტი. მისივე ცნობით, რამდენიმე კვირაში დაიწყება კვლევითი ღონისძიებები და უახლოეს მომავალში მუნიციპალური განვითარების ფონდი, აზიის განვითარების ბანკის ფინანსური მხარდაჭრით თბილისის მდგრადი ურბანული მობილობის შესყიდვაზე ტენდერს გამოაცხადებს.