ფრესკოს დამფუძნებელი, ვასილ სოფრომაძე ამბობს, რომ თბილისში, წერეთლის გამზირზე სუპერმარკეტის ახალი ფილიალის გახსნა სურს. სოფრომაძე ამტკიცებს, რომ თბილისის მერიამ რეკომენდაციის სახით ურჩია, ახალი სუპერმარკეტისთვის მიწის ნაკვეთი ერთ-ერთი მაღალჩინოსნის ნათესავისგან იყიდოს. ამის შესახებ ის ვიდეომიმართვაში საუბრობს.

"ჩვენი კომპანია აპირებს დიდუბეში, წერეთლის პროსპექტზე ჩვენი ახალი სუპერმარკეტის აშენებას და ქალაქის მერიიდან ოფიციალურად მომდის წერილი, რომელშიც რეკომენდაციის სახით მირჩევენ, ქალაქის ერთ-ერთი ხელმძღვანელის ნათესავის მიწის ნაკვეთი ვიყიდო", — ამბობს სოფრომაძე.

ვიდეომიმართვა 9-წუთიანია. სოფრომაძე არ ასაჯაროებს არც წერილს და არც იმ მაღალჩინოსნის ვინაობას ამხელს, რომლის ნათესავის მიწის ნაკვეთის ყიდვაც მისივე თქმით, მერიაში ურჩიეს.

თბილისის მერის მოადგილის, მაია ბითაძის განმარტებით, როდესაც გარკვეული უბნის თუ ტერიტორიის ფორმირება ხდება, მერია ხშირად იყენებს ამგვარ რეკომენდაციას — შეუსაბამო ნაკვეთებთან დაკავშირებით, განმცხადებელს სთხოვს, იქნებ ეს ტერიტორიები დააგეგმაროს.

"ეს არის სარეკომენდაციო ხასიათის მითითება, რასაც რეგულარულად გავცემთ განაშენიანების გეგმის ფარგლებში, სადაც ასეთი ობიექტებია, რათა არ დარჩეს ისინი დაგეგმარების მიღმა. სივრცითი მოწყობის კანონმდებლობა სწორედ ამას ითვალისწინებს, რომ დაგეგმარება მოხდეს სწორად, რადგან არ დარჩეს გაუნაშენიანებელი ტერიტორია, რაზეც განაცხადია შემოსული", — აცხადებს ბითაძე.