მოქანდაკე, ფერმწერი და გრაფიკოსი, საქართველოს სახალხო მხატვარი, მერაბ ბერძენიშვილი 87 წლის ასაკში გარდაიცვალა.

ბერძენიშვილი ძირითადად მონუმენტური ქანდაკების დარგში მუშაობდა. მისი ნამუშევრებია: ვახტანგ გორგასლის ძეგლის პროექტი, მონუმენტები: დავით გურამიშვილი, გიორგი სააკაძე, მედეა, მუზა და სხვა. ის ასევე მუშაობდა გრაფიკისა და ფერწერის დარგში.

ბერძენიშვილი იყო რუსთაველის სახელობის სახელმწიფო პრემიის ლაურეატი. მას ასევე თბილისის საპატიო მოქალაქის წოდება ჰქონდა მინიჭებული.

პრემიერმინისტრის, გიორგი კვირიკაშვილის ინფორმაციით, ბერძენიშვილის დაკრძალვის ხარჯებს სახელმწიფო გაიღებს:

"დიდ მწუხარებას გამოვთქვამ სახელგანთქმული მოქანდაკის - მერაბ ბერძენიშვილის გარდაცვალების გამო. მემკვიდრეობა, რომელიც მერაბ ბერძენიშვილმა დატოვა, ჩვენი ქვეყნის სიმდიდრეა. მის მიერ შექმნილი მონუმენტური ქანდაკებები საუკეთესოდ ასახავს ჩვენს მრავალსაუკუნოვან ისტორიას, ქართველი კაცის ბუნებას, ჩვენს უმთავრეს ღირებულებებს.

სამძიმარს ვუცხადებ ბატონი მერაბის ოჯახს, ახლობლებს, მთელ საქართველოს. მერაბ ბერძენიშვილის გარდაცვალებასთან დაკავშირებით შექმნილია სახელმწიფო კომისია და დაკრძალვის ხარჯებს გაიღებს სახელმწიფო".