თითოეული ჩვენგანი ყოფილა ბავშვი და ასევე თითოეულ ჩვენგანს გამოუცდია ის საშინელი განცდა, როდესაც თბილ ლოგინში წოლა და კარგად გამოძინება გვინდოდა, მაგრამ სკოლა ამის საშუალებას ფიზიკურად არ გვაძლევდა. გამონაკლისი არც ექვსი წლის ლილი სკოულია, რომლისთვისაც ადრე გაღვიძება და სკოლაში წასვლა ყოველდღიურობის განუყოფელი ნაწილია.

ჩვენგან განსხვავებით, პატარა ლილი გაცილებით მოხერხებული აღმოჩნდა და მშობლების გაცურება საკმაოდ კრეატიული ხერხით სცადა. უნდა აღინიშნოს, რომ ამ ხრიკის შესახებ ბავშვმა იუთუბის ერთ-ერთი ვიდეოდან გაიგო, სახელწოდებით — "10 გზა, როგორ დავუძვრეთ სკოლას".

ფოტო: Kennedy News and Media

"დილით ჩამოვიდა მისაღებ ოთახში და წითელი კალამი მომთხოვა, რათა საშინაო დავალება შეესრულებინა. 10 წუთის შემდეგ კი დაბრუნდა და თქვა, რომ კანი ექავებოდა და თავს ძალიან ცუდად გრძნობდა. როდესაც მე და ჩემი ქმარი სხეულზე დავაკვირდით, დავინახეთ, რომ მთელ სხეულზე წითელი გამონაყარი ჰქონდა. მართალია, თავიდანვე ყველაფერს მივხვდით, მაგრამ გადავწყვიტეთ, რომ პატარა მატყუარასთვის ჭკუა გვესწავლებინა და განვუცხადეთ, რომ სასწრაფოდ ექიმთან მიგვყავდა. ამის შემდეგ კი ის გამოტყდა და აღიარა, რომ გამონაყარი საკუთარი ხელით დაიხატა სხეულზე", — ამბობს ლილის დედა.

ფოტო: Kennedy News and Media

ფოტო: Kennedy News and Media

სამწუხაროდ, თუ საბედნიეროდ ლილის ოინმა ვერ გაამართლა და სხეულზე მარკერის კვალის წაშლაც საკმაოდ რთული აღმოჩნდა.

თავად პატარა ლილის კი ძალიან გაუმართლა, რადგან უქმე დღეები მოდიოდა და წითელი, ძალიან საყვარელი ლაქებით დაწინწკლულს სკოლაში წასვლა სულ ერთხელ მოუწია.

მართალია, ხელოვნური ჩუტყვავილას კვალი საბოლოოდ მაინც გაქრა, მაგრამ დარწმუნებული ვართ, რომ ეს გაკვეთილი მას მთელი ცხოვრების მანძილზე ემახსოვრება.