დეპუტატებს რეგლამენტით, განათლების სამინისტროს მოთხოვნის შემთხვევაში, შესაძლებლობა აქვთ ხელახლა მისცენ ხმა მესამე მოსმენით, "ხმაურის გამო" ჩაგდებულ კანონპროექტს საგამოცდო რეფორმის შესახებ. ამ კანონით სკოლებში გამოსაშვები გამოცდები უნდა გაუქმებულიყო.

საპროცედურო საკითხთა კომიტეტის თავმჯდომარემ გიორგი კახიანმა On.ge-სთან საუბარში განმარტა, რომ როდესაც კანონპროექტი ხმების საჭირო რაოდენობას ვერ იღებს მესამე მოსმენის დროს, ინიციატორს უფლება აქვს სასესიო პერიოდის განმავლობაში, განმეორებით დააყენოს კანონპროექტი კენჭისყრაზე. მისივე თქმით, შესაძლებელია, რომ უახლოეს ერთ თვეში მსჯელობის გარეშე, განმეორებით ჩატარდეს კენჭისყრა. კახიანი აღნიშნავს, რომ თეორიულად, შესაძლებელია, რომ დღესვე უყარონ კენჭი ამ პროექტს, ბიუროს გავლის შემდეგ, თუ ინიციატორი ამას მოითხოვს:

"თუ დღეს არ მოხდა ეს, მაშინ, სავარაუდოდ, ორი კვირის შემდეგ, იმ კვირაში იქნება შესაძლებელი".

დღეს, 5 აპრილის სესიაზე ჩატარებულ კენჭისყრაზე კანონპროექტს, რომელიც განათლების სამინისტრომ კენჭისყრაზე დაჩქარებული წესით გამოიტანა, მხარი 54-მა დეპუტატმა დაუჭირა, კანონის მისაღებად 63 დეპუტატის მხარდაჭერა იყო საჭირო. მოგვიანებით, ქართული ოცნების დეპუტატმა განაცხადა, რომ ხმაურის გამო კანონპროექტის დასახელება ვერ გაიგო.