2-3 აპრილს ჟენევის საერთაშორისო მოლაპარაკებების მორიგ რაუნდზე ქართულმა მხარემ რუსულ სამხედრო ბაზაზე ტყვეობაში მყოფი საქართველოს მოქალაქის, ირაკლი კვარაცხელიას უკანონო დაკავებასა და ოკუპირებულ ტერიტორიაზე მის გაურკვეველ ვითარებაში გარდაცვალების საკითხი დააყენა. ქართველმა მონაწილეებმა მოითხოვეს დეტალური ინფორმაციის გაზიარება საქართველოს მოქალაქის გარდაცვალების ობიექტური გარემოებების დასადგენად. უწყების ინფორმაციით, კიდევ ერთხელ დააყენეს დავით ბაშარულის, გიგა ოთხოზორიასა და არჩილ ტატუნაშვილის მკვლელობის საქმეებზე მართლმსაჯულების აღსრულების აუცილებლობა.

საგარეო საქმეთა სამინისტროს განცხადებით, შეხვედრისას რუსეთისა და მისი საოკუპაციო რეჟიმების წარმომადგენლებმა ისევ დესტრუქციული მიდგომა გამოიჩინეს და იძულებით გადაადგილებულ პირთა და ლტოლვილთა დაბრუნების საკითხის განხილვისას დატოვეს მოლაპარაკებები, საგნობრივი დისკუსიის თავიდან ასაცილებლად.

უწყების ცნობით, საქართველოს დელეგაციამ მწვავედ დააყენა კონფლიქტით დაზარალებული მოსახლეობის უსაფრთხოებისა და ჰუმანიტარული პრობლემები. ქართულმა მხარემ განსაკუთრებული აქცენტი გააკეთა რუსეთის უსაფრთხოების სამსახურების მიერ ადგილობრივი მოსახლეობის უკანონო დაკავებებისა და გატაცებების პრაქტიკაზე.

ქართლმა მხარემ გალის ინციდენტების პრევენციისა და მათზე რეაგირების მექანიზმების (იპრმ) დაუყოვნებლივ, ყოველგვარი წინაპირობების გარეშე, აღდგენის აუცილებლობაზე ისაუბრა.

მოლაპარაკებების მორიგი რაუნდი გაიმართება 2019 წლის 2-3 ივლისს.