გურჯაანის რაიონის სოფელ კაჭრეთის მაცხოვრებელი პოლიციას ფიზიკურ ძალადობაში ადანაშაულებს. ოჯახის წევრის განცხადებით, დაზარალებულს შედეგად ჰემატომა განუვითარდა. ინფორმაცია ამის შესახებ რუსთავი 2-მა გაავრცელა.

როგორც On.ge-ს შინაგან საქმეთა სამინისტროში განუცხადეს, მომხდართან დაკავშირებით გენერალურმა ინსპექციამ მოკვლევა ჩაატარა, თუმცა პოლიციელების მხრიდან განხორციელებული რაიმე სახის ძალადობა ან შეურაცხყოფა არ დადასტურდა. უწყებაში განმარტავენ, რომ მიმდინარე წლის 22 მარტს მათ არასრულწლოვანმა მიმართა და განაცხადა, რომ ბიძა მისი ოჯახის წევრების სახლიდან გაგდებას აპირებდა. მათი თქმით, პოლიციამ გამოკითხა არასრულწლოვანი და მისი დედა, რომლებმაც განმარტეს, რომ აღნიშნულ პირი ალკოჰოლის ზემოქმედების ქვეშ აგრესიული ხდება, რაც ოჯახში კამათის მიზეზი გახდა. უწყების განცხადებით, აღნიშნულ პირზე გამოსცეს შემაკავებელი ორდერი.

შსს-ში ამბობენ, რომ ორდერის გამოცემიდან 10 დღის შემდეგ გურჯაანის რაიონულ სამმართველოში ჯეო ჰოსპიტალსიდან შევიდა შეტყობინება, რომ კლინიკაში უგონო მდგომარეობაში შეიყვანეს აღნიშნული პირი, რომელსაც თავში ჰემატომა ჰქონდა. ბრალდებულის და აცხადებდა, რომ მის ძმას პოლიციამ დაზიანებები მიაყენა, რამაც შესაძლოა ჰემატომა გამოიწვია.

უწყების განცხადებით, სამსახურებრივი შემოწმების ფარგლებში ამოიღეს და დაათვალიერეს კაჭრეთის პოლიციის განყოფილებაში არსებული ვიდეოკამერების ჩანაწერები. ასევე, გამოიკითხეს პოლიციელები, რომლებსაც 22 მარტს უშუალო შეხება ჰქონდათ ბრალდებულთან და ძალადობის ფაქტი არ დადასტურდა. მათივე თქმით, პარალელურად, აღნიშნულ საქმეზე გამოძიებას კახეთის საოლქო პროკურატურა აწარმოებს.