საქართველოს კულტურული მემკვიდრეობის დაცვის სააგენტო კლდეში ნაკვეთი ძეგლების: ვანის ქვაბების, დავით-გარეჯის სამონასტრო კომპლექსის, უფლისციხის კლდეში ნაკვეთი ნაქალაქარის რეაბილიტაციას გეგმავს. სულ სამუშაოებისთვის 10 მილიონი ლარის დახარჯვაა დაგეგმილი.

"იმ დეკადების განმავლობაში, როდესაც საქართველო სოციო-პოლიტიკური მიზეზების გამო მოწყვეტილი იყო კულტურული მემკვიდრეობის სფეროს დაცვის ახალ შესაძლებლობებს, ჩვენი გამორჩეული კლდის ძეგლები, რომელთა ღირებულებაც მსოფლიო მემკვიდრეობის კომიტეტის მიერ აღიარებულია კიდევ მეტად აღმოჩნდნენ დაშლის და განადგურების საფრთხის წინაშე", — აღნიშნავს კულტურული მემკვიდრეობის სააგენტო შესყიდვების სააგენტოსთვის მიწოდებულ ინფორმაციაში.

მათივე განმარტებით, აღნიშნული გარემოების გამო ზიანდება ძეგლი და ვეღარ აკმაყოფილებს ვიზიტორთა უსაფრთხოების ნორმებს.