იძულებით გადაადგილებულ ოჯახებს მეოთხე დღეა თბილისში, ისნის დასახლებაში კომპანია დირსის კორპუსი აქვთ დაკავებული. ისინი ხელისუფლებისგან ბინებით უზრუნველყოფას ითხოვენ, წინააღმდეგ შემთხვევაში კორპუსს არ დატოვებენ და შიმშილობის დაწყებას აანონსებენ.

გარდა ამისა, ისინი მოითხოვენ, რომ კორპუსის გარშემო პოლიციის კორდონი მოიხსნას და მათ იურისტსა და ჟურნალისტებს შესვლის საშუალება მისცენ.

იძულებით გადაადგილებულმა პირებმა დირსის კორპუსი 30 მარტს დაიკავეს. ისინი ამბობენ, რომ დევნილთა სამინისტრო მათ დირსის კორპუსში ბინებით დაკმაყოფილებას დაჰპირდა, თუმცა დაპირება არ შესრულდა.

კომპანიის გენერალური დირექტორი, ბესიკ ჯიქურაშვილი ამბობს, რომ დევნილები კორპუსში "ვანდალურად შეიჭრნენ":

"შიგნით დაამტვრიეს ბინის კარებები, ფიზიკურად გაუსწორდნენ ჩვენი დაცვის სამსახურს, დაიკავეს სადარბაზოები და გამოიკეტნენ. მე ვფიქრობ, რომ ეს არის კერძო საკუთრების ძალიან ცუდი გზით შელახვა, რომელიც არის დაუშვებელი... მე მინდა მოვუწოდო მათ, რომ ეს არის კერძო საკუთრება, არის ჩვენი ქონება, მათი ქმედებით ზიანი ადგება ჩვენს ინვესტიციას და, ასევე, სამომავლო გეგმებს".

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე, გრიგოლ გიორგაძე ამბობს, რომ ეს კორპუსები ეს ბინები ამჟამად რემონტდება და სამინისტროსთვის გადაცემული არ არის. მისივე თქმით, დევნილები ამჟამად კერძო საკუთრებაში არიან შეჭრილები

"ეს ადამიანები, რა თქმა უნდა, გაჭირვებულები არიან, რომლებსაც, რა თქმა უნდა, ეკუთვნით ბინები, მაგრამ არის წესი და რიგი. 30 ოჯახი, რომელიც აქ შეიჭრა, ამათ გარდა არის ასეულობით გაჭირვებული ოჯახი და ყველას შეფასებაა საჭირო და გადაწყვეტილების მიღება", — აღნიშნა გიორგაძემ.