საზოგადოებრივ მაუწყებელში აცხადებენ, რომ პირველ არხზე ჯემალ სეფიაშვილის სიმღერის ან კლიპის პრემიერა არ იგეგმება. საუბარია 9 აპრილისთვის მიძღვნილი სიმღერის ვაჩუქოთ ერთმანეთს ტიტები ახალ ვერსიაზე, რომელსაც მხოლოდ კაცები მღერიან.

მათი თქმით, იგეგმება 9 აპრილის ტრაგედიის 30 წლისადმი მიძღვნილი ღონისძიების ტრანსლაცია, რომლის პროგრამასა და შინაარსობრივ ნაწილზე პასუხისმგებელი პირველი არხი არ არის.

საზოგადოებრივ მაუწყებელზე ერთი კვირის წინ გასულ სიუჟეტში მოამბის წამყვანი ამბობს: "კომპოზიციას ახალი ინტერპრეტაციით ისევ პირველი არხი შემოგთავაზებთ".

9 აპრილის ტრაგედიიდან 30 წლის თავზე 25 მომღერალი სიმღერის ვაჩუქოთ ერთმანეთს ტიტები ახალ ვერსიას წერს. კომპოზიტორის, ჯემალ სეფიაშვილის განმარტებით, სიმღერას მხოლოდ კაცები შეასრულებენ, რადგან "ქვეყნის დამცველი კაცია". 1989 წლის 9 აპრილს 21 მოკლულიდან 17 ქალი იყო.