გადაცემა The Grand Tour-ის საქართველოზე გადაღებულ ეპიზოდში ოკუპაციაზე ისაუბრეს. გადაცემის წამყვანები ხურვალეთში ჩავიდნენ და საოკუპაციო ხაზის მიღმა მცხოვრებ დათა პაპას, დავით ვანიშვილს შეხვდნენ.

"ეს საზღვარია, რომელიც საზღვარი არ არის. ჩვენ აქ ვართ, აი იქეთ არის საზღვარი რუსეთსა და საქართველოს შორის, რომელსაც უმეტესობა აღიარებს, მაგრამ რუსებს მიაჩნიათ, რომ საზღვარი აქ უნდა იყოს. საღამოობით ისინი საზღვარს წევენ. წარმოიდგინე, საქართველოში ცხოვრობ და დილით იღვიძებ რუსეთში", — განუმარტავდა ჯერემი კლარკსონი თანაწამყვანებს რიჩარდ ჰამონდსა და ჯეიმს მეის.

წამყვანებმა ხურვალელ დათა პაპას ჰკითხეს, შეუძლია თუ არა საქართველოში დაბრუნება, რაზეც მან უპასუხა, რომ რუსი სამხედროები მას აკავებენ და ოკუპირებულ ცხინვალში გადაყავთ.

ხურვალეთში მოგზაურობის ნაწილის ქართული თარგმანი კი ფეისბუქგვერდმა TOP Georgian cars-მა გამოაქვეყნა.

The Grand Tour-ის წამყვანები საქართველოში ტურის დროს გორში იოსებ სტალინის მუზეუმსაც ეწვიენ და მას ყველა დროის ყველაზე დიდი დიქტატორი უწოდეს.

გადაცემის ჩაწერისას არაერთხელ აჩვენებენ კავკასიის რუკას, სადაც საქართველოს საზღვრებში აფხაზეთი და ცხინვალის რეგიონიც შედის.

The Grand Tour-ის წამყვანები საქართველოს ოქტომბერში ეწვიენ. ბათუმიდან თბილისამდე მოგზაურობისას მათ სურამში ნაზუქები დააგემოვნეს, ბენტლიზე დამაგრებული სტალინის ბიუსტით იმგზავრეს. შემდეგ კი მშრალ ხიდზე იშოპინგეს და ქართული ქვევრები შეიძინეს.

ჯერემი კლარკსონი BBC-ის გადაცემა Top Gear-ს ორ თანაწამყვანთან ერთად 2002 წლიდან 2015 წლამდე უძღვებოდა. მას შემდეგ, რაც კლარკსონი გადაცემიდან სკანდალურად გამოუშვეს, მან Amazon Prime-ისთვის ახალი გადაცემა, Grand Tour შექმნა, რომელშიც ის და მისი თანაწამყვანები მსოფლიოს გარშემო მოგზაურობენ.